प्याब्सकको दोस्रो एकल आधुनिक गायन प्रतियोगिताको तयारी पूरा

काठमाडौं १८ भदौ / निजी तथा आवासीय विद्यालय संगठन काठमाडौं (प्याब्सक) को दोस्रो एकल आधुनिक गायन प्रतियोगिताको तयारी पूरा भएको छ ।

विद्यार्थीभित्र रहेका प्रतिभा र सम्भाव्यतालाई पहिचानको अवसर सिर्जना गर्दै औपचारिक शिक्षासँगसँगै उनीहरुमा बहुमुखी प्रतिभा र व्यक्तित्वको विकास गराउनका लागि गत वर्षबाट थालिएको उक्त प्रतियोगिताको दोस्रो संस्करणको तयारी पूरा भएको आयोजक प्याब्सकले जनाएको छ ।

प्याब्सकका अध्यक्ष बालकुमार गुरुङले उक्त प्रतियोगिताका लागि गत भदौ १ गतेदेखि १५ गतेसम्म विद्यालयलाई आन्तरिक अडिसनका लागि समय दिइएको बताउँदै प्रतियोगितामा ५५ विद्यालयहरुको सहभागिता रहेको जानकारी दिए ।

प्रत्येक विद्यालयबाट २ जना विद्यार्थीको सहभागितामा हुने उक्त स्पर्धाअन्तर्गत भदौ २० गते काठमाडौंको कमलपोखरीस्थित रसियन कल्चर सेन्टरमा मेधा राउण्ड हुनेछ । सो राउण्डबाट छानिएर उत्कृष्ट २० मा पर्न सफल स्पर्धी विद्यार्थीलाई प्रतियोगिताको अन्तिम चरणमा स्पर्धा गराइने छ । उक्त स्पर्धा भने असोज १ गते हुनेछ ।

निजी विद्यालयहरुको हकहित र संरक्षण, विद्यालयहरुको क्षमता अभिवृद्धि र शिक्षक तथा कर्मचारीहरुको सुरक्षाको विषयमा विभिन्न काम गर्दै आइरहेको प्याब्सकको सो प्रतियोगिताबाट उत्कृष्ट १० विद्यार्थीलाई विशेष सम्मान गरिने छ ।

प्रतियोगिताबारेमा जानकारी दिन आयोजित पत्रकार सम्मेलनमा प्याब्सकका कोषाध्यक्ष राजन श्रेष्ठले स्पर्धामा प्रथम, द्धितीय र तृतीय हुने विद्यार्थीलाई क्रमशः रु. ७ हजार, रु. ५ हजार र रु. ३ हजार नगदसहित पुरस्कृत गरिने पनि बताए ।

प्याब्सकमा अहिले ४९ विद्यालय सदस्य छन् ।

:655 Views

Leave a Reply