गुरु रोइरहेका छन् : उपकूलपति

भक्तपुर, २४ भदौ । नेपाल संस्कृत विश्वविद्यालयका उपकूलपति डा.कुलप्रसाद कोइरालाले राम्रो विद्यार्थीको निर्माण गर्न गुरु राम्रो हुनुपर्ने बताएका छन् ।

‘राम र लक्ष्मण जन्माउन वशिष्टको आवश्यकता पर्छ’, उनले भने, ‘मन्टेश्वरीमा हामी पुग्दा हाम्रा वशिष्ट गुरु रोइरहेका छन् ।’ संस्कार, ज्ञान, कलमले परिवर्तन गराउनु पर्नेमा उनले जोड दिएका छन् । ‘अग्रँेजी नजान्ने मानिस डाक्टर, इञ्जिनियर, पाइलट बन्न सक्दैनन् भन्नु गलत हो, नेपाली भाषालाई विधिपूर्वक प्रयोग गरेर काम गर्न सकिन्छ’, उनले थपे ।

समाजवाद अध्ययन केन्द्रद्वारा आयोजित हस्तलेखन, निबन्ध लेखन र आई क्यु टेस्ट प्रतियोगितामा समाजवाद अध्ययन केन्द्रका संरक्षक तथा नेपाल संस्कृत विश्वविद्यालयका सहप्राध्यापक शान्तिकृष्ण अधिकारीले विद्यार्थीहरुलाई अरुको कुरा सुनेर भन्दा पनि आफ्ना रुचिको विषय पढ्नलाई सल्लाह दिए । कार्यक्रममा माधव अर्यालले स्मरणको महत्वलाई दर्शाउने केही क्रियाकलाप गरेका थिए ।

प्रतियोगिताबाट चाँगुनारायणका उत्कृष्ट ९ विद्यार्थी छनोट गरिएको छ । चाँगुनारायण ‘नगरपालिकास्तरिय प्रतिभाको पहिचान’ नामक कार्यक्रम भक्तपुरको कमलविनायकस्थित स्टार बैंक्वेटमा सम्पन्न गरिएको हो ।

अन्तर्राष्ट्रिय साक्षरता दिवस २०१८ को अवसरमा चागुँनारायण नगरपालिकाको स्कुलमा अध्ययनरत र त्यहि बसोबास गरी अन्यत्र स्कुलमा अध्ययनरत विद्यार्थीबाट नगरपालिकास्तरिय प्रतिभाको पहिचान गर्ने उद्देश्यले यो कार्यक्रम सञ्चालन गरेको समाजवाद अध्ययन केन्द्रका अध्यक्ष दुर्गा प्रसाद फुयालले बताएका छन् । उनले शिक्षालाई मानव अधिकारको रुपमा लिनुपर्नेमा जोड दिएका थिए । उनका अनुसार अभिभावकको भोगाई र सिकाईलाई हरेक विद्यार्थीले शिक्षाको रुपमा लिन सके विद्यार्थीको आफ्नो प्रतिभा बढ्दछ । उनले यो प्रतियोगिता एक प्रकारको निजी र सामुदायिक विद्यालयबिचको प्रतिस्पर्धा भएको बताए ।

चागुँनारायणभित्रका ५२ र अन्य गरी जम्मा ६० वटा विद्यालयले यस प्रतियोगितामा भाग लिएका थिए । हस्तलेखनमा कक्षा ६,७,८ र निबन्धमा कक्षा ९,१० र त्यस्तै आई क्यू टेस्टमा कक्षा १०, ११, १२ का विद्यार्थीहरुले आफ्नो सहभागिता जनाएका थिए । हस्तलेखन प्रतियोगिताका २७५सहभागी विद्यार्थीबाट प्रथम, द्वितीय र तृतिय क्रमश:कक्षा ८ की रोशनी तामाङ (मनकामना मा.वि), कक्षा ७ का उपाधि सुवाल (एभरेस्ट इङ्लिश स्कुल) र कक्षा ७ की चण्डिका बारी (गोल्डेन सुनगाभा) भएका छन् । त्यस्तै निबन्ध लेखन प्रतियोगिताका १६५ सहभागी विद्यार्थीबाट प्रथम, द्वितीय र तृतीय क्रमश: कक्षा ९ का साई थापा (महेन्द्र विद्याश्रम), कक्षा १० की सृजना श्रेष्ठ (महेन्द्र ग्राम मा.वि), कक्षा ९ का भुपेन्द्र पुवौर मगर (देवी मा.वि) भएका छन् । आई क्यू टेस्टका ६४ प्रतिस्पर्धिमध्ये फुल ब्राइट इङ्लिश स्कुलको रसिका आचार्य प्रथम, ख्वप सेकेण्डरी स्कुलका दिवाकर तिमल्सिना द्वितीय र ख्वप सेकेण्डरी स्कुलकै रोशन थापा तृतीय भएका छन् ।

हस्तलेखन प्रतियोगिताका निर्णायक मण्डलमा डा.नारायण चालिसे, डा.भागवत ढकाल र मोहन गौली रहेका थिए । निर्णायक डा.भागवत ढकालका अनुसार हस्तलेखनमा वर्ण, हिज्जे, शुद्धता, सौन्दर्य र लेखनको विषयवस्तुलाई निर्णयको आधार मानिएको थियो । त्यस्तै निबन्धमा मौलिकता, हार्दिकता र आफ्नो अभिव्यक्तिको मुल्याङ्कन गरिएको उनले बताए ।

हस्तलेखन प्रतियोगितामा प्रथम, द्वितीय र तृतीय हुनेलाई नगद क्रमश: ४ हजार, ३ हजार र २ हजारका साथ ट्रफी र प्रमाणपत्र दिइएको थियो । त्यस्तै निबन्ध प्रतियोगितामा प्रथम, द्वितीय र तृतीय हुनेलाई नगद क्रमश : हजार, ४ हजार र ३ हजारका साथ ट्रफी र प्रमाणपत्र दिईएको थियो । आई क्यू टेस्टप्रतियोगितामा प्रथम, द्वितीय र तृतीय हुनेलाई नगद क्रमश: ८ हजार, ६ हजार र ४ हजारका साथ ट्रफी र प्रमाणपत्र दिइएको थियो । हरेक विधामा प्रथम भएका विद्यार्थीे अध्ययनरत स्कुललाई एक राष्ट्रिय दैनिक पत्रिका पुस्तकालय अभियानका लागि एक वर्षसम्म उपलब्ध गराइने भएको छ ।

:1023 Views

Leave a Reply