विद्यार्थी र शिक्षकको सिकाइ बढाउन मेला

सिन्धुपाल्चोक, २ माघ । सिन्धुपाल्चोकको भोताङस्थित भोताङदेवी माध्यमिक विद्यालयले ‘क्षितिज सिकाइ मेला २०७५’ सम्पन्न गरेको छ ।

विद्यार्थीमात्र नभई शिक्षक र शैक्षिक अभियन्ताको पनि सिकाइका साथ साथै शैक्षिक स्थितिको सुधार एवम् प्रवर्द्धन गर्न पुस २७ गते शुक्रबार मेला गरिएको थियो ।

‘विज्ञान, प्रविधि र कलाको प्रवद्र्घन, हामी सबैको सम्बोधन’ मूल नाराका साथ गरिएको मेलाको प्रायोजन पाँचपोखरी थाङपाल गाउँपालिकाले गरेको थियो ।

दशवटा विद्यालयका विद्यार्थीहरुले ३४ वटा विभिन्न स्टलमार्फत आफ्ना सिकाइ प्रस्तुत गरे भने काठमाडौँका विभिन्न स्कुल र कलेजले आफ्ना स्टलमार्फत कक्षा दश पढ्ने विद्यार्थीलाई परामर्श गरेका थिए ।

अठार विद्यालयका लगभग हजार विद्यार्थी, अभिभावक र अन्य अतिथिहरु (स्थानीय प्रशासकीय अधिकृत, विभिन्न संघसंस्थाका व्यक्तित्व) गरी मेलामा जम्मा २ हजार ७ सय दश जनाको सहभागीता थियो ।

मेलामा पाँचपोखरी थाङपाल गाउँपालिकाका अध्यक्ष टासी लामा ह्योल्मो, भोताङदेवी माध्यमिक विद्यालयको विद्यालय व्यवस्थापन समितिका अध्यक्ष नीर बहादुर लोप्चन, टिच फर नेपालका प्रमुख कार्यकारी अध्यक्ष शिशिर खनाल र हेल्प–नेपालका संस्थापक जिम्मी लामा उपस्थित थिए ।

:193 Views

Leave a Reply