महिला रोजगारी बढाउन नगरपालिकाद्वारा मन्टेश्वरी तालिम

भक्तपुर, १० जेठ । भक्तपुरको चाँगुनारायण नगरपालिकाले महिलालाई रोजगारीको अवसर दिने उद्देश्यले भक्तपुरको पाथिभरा एकेडेमीको सहकार्यमा नगरका ९ वटा वडाबाट ६१ महिलालाई मन्टेश्वरी तालिम दिने भएको छ ।

मन्टेश्वरी तालिमको उद्घाटन गदै उपमेयर बिना बास्तोलाले यो तालिमले बेरोजगार भएका शिक्षित महिलालाई रोजगारीको वातावरण सृजना गर्ने बताएकी छिन् ।

चागुनारायण ७ वडामा बस्ने ४५ वर्षीय निता श्रेष्ठ हाल बालमिकी आधारभुत विद्यालयमा पढाउछिन् । १२ वर्षदेखि शिक्षण पेशामा लागेकी उनी बालबालिकाको चाहना अनुसार विभिन्न साधनको प्रयोगबाट उनीहरुलाई सहज तरिकाबाट कसरी पढाउने भन्ने कुरा सिक्ने इच्छाका साथ मन्टेश्वरी तालिममा सहभागी हुन आएकी छिन् । कार्यक्रममा केही शिक्षिका महिलाहरुको पनि सहभागीता रहेकोमा उनीहरु बच्चालाई पढाउन सिकाउने शैली र शिक्षण गुणस्तरमा बृद्धि गर्ने हेतुले तालिममा सहभागी भएको बताए ।

मन्टेश्वरीका प्रशिक्षक तथा पाथिभरा एकेडेमीका प्रिन्सिपल रमेश सिटौला स्थानिय सामाग्री, उपयोग नभएका सामानकोे प्रयोगबाट कसरी विद्यार्थीहरुलाई सिकाउने, व्यक्तिगत रुपमा फरक बच्चालाई कसरी व्यवहार गर्ने भन्ने विषयमा तालिममा सिकाउने बताउँँछन् । साना कक्षामा मात्र नभई ठुला कक्षामा पनि यो विधिको प्रयोगबाट पढाउन सकिने भन्दै उनी भन्छन्, ‘मन्टेश्वरी भन्ने एउटा व्यक्तिको नाम हो । डाक्टर मन्टेश्वरी मारियाले आफ्नै शैलीमा पढाउन थालेको शैली अरुले पनि प्रयोग गर्दै अहिले मन्टेश्वरी भन्दै चलिरहेको छ । मन्टेश्वरी प्रणाली जन्मेदेखि युवावस्थासम्मका लागि आवश्यक छ । यो प्रणालीलाई कक्षा १२ सम्म लान सकिन्छ ।’

३ महिने मन्टेश्वरी तालिम १२ गते आइतबारको दिनबाट पाथिभरा एकेडेमीमा सञ्चालन हुने भएको छ । पालिकाले महिला लक्षित गर्दै ब्युटीपार्लर र ड्राइभिङको तालिम पनि सुरु गरिसकेको छ ।

:95 Views

Leave a Reply