इ.जि पायोनियरको रजत महोत्सव सम्पन्न

भक्तपुर । इ.जि पायोनियर स्कुल इताँछेको रजत महोत्सव विविध कार्यक्रमका साथ मनाइएको छ । २०५० माघमा स्थापित सो विद्यालयले स्थापनाको २५ वर्षमा आफ्ना धेरै विद्यार्थीहरु चिकित्सक, इन्जिनियर लगायत स्थापित सरकारी कर्मचारीको रुपमा स्थापित भईसकेको विद्यालयका संस्थापक प्रिन्सिपल बिजेन्द्र ध्वँजुले बताए ।
कार्यक्रमको उद्घाटन गर्दै भक्तपुर नगरपालिकाका प्रमुख सुनिल प्रजापतिले शिक्षा प्रमाणपत्रको लागि नभई आत्मनिर्भर र स्वावलम्वी बनाउने हुनुपर्ने कुरामा जोड दिए । उनले भक्तपुर नगरलाई साँस्कृतिक नगर, पर्यटकीय गन्तव्यस्थल र ज्ञान–विज्ञानको केन्द्र बनाउने उद्देश्य बोकेको र भक्तपुरको शिक्षा, संस्कृति, सम्पदा, भाषा आदिमा दक्ष बनाउन भक्तपुर नगरपालिकाले नगरभित्रका विद्यालयहरूमा स्थानीय पाठ्यक्रम लागु गरेको पनि बताए ।
भक्तपुर नपा वडा नं. २ का वडाअध्यक्ष हरिप्रसाद बासुकलाले भक्तपुर नगरपालिकाको चौथो नगरसभाले नगरक्षेत्रमा स्थायी बसोबास गर्ने गरिव तथा जेहेन्दार विद्यार्थीका लागि ५ लाख रुपैयाँसम्मको सहुलियत ऋण प्रदान गर्ने विधेयक पारित गरेको बताए ।
कार्यक्रममा इतिहासविद् पुरुषोत्तमलोचन श्रेष्ठ, संस्कृतिविद् तेजेश्वरबाबु ग्वंग, प्याब्सनका उपाअध्यक्ष चन्द्र अधिकारी, प्याब्सन भक्तपुर नगर समितिका अध्यक्ष रमेशचन्द्र श्रेष्ठ, शिक्षक पारसमणि खतिवडा, रवि भारतीलगायतले शुभकामना बोलेका थिए ।
रजत महोत्सवको अवसरमा नगर प्रमुख सुनिल प्रजापतिले विद्यालयमा लामो समयदेखि कार्यरत शिक्षक, विद्यालयका शुभचिन्तक, सहयोगी, पत्रकार, संघसंस्था लगायतलाई सम्मान गरे । कार्यक्रममा विद्यालयका उत्कृष्ट विद्यार्थीको साथै विभिन्न प्रतियोगिताका विजयीहरुलाई पनि पुरस्कृत गरिएको थियो ।

:485 Views

Leave a Reply