छोराछोरी स्याहार्ने ‘आमा र काकी’ खोज्दै एसओएस वालग्राम नेपाल

काठमाडौं, फागुन २४ । अन्तराष्ट्रिय वालहितकारी संस्था एसओएस वालग्राम नेपालले छोेराछोरीलाई माया गरेर हुर्काउन सक्ने इच्छा र खुवी भएका २५ जना आमा र काकी खोजेको छ । एसओएस वालग्राममा आमा र काकीको पद आवासिय, सञ्चयकोष, औषधि उपचारसहितको राम्रो पारिश्रमिक पाउने सुविधायुक्त र जिम्मेवारीपुर्ण पद हो ।

एसओएस वालग्राम विगत ४८ वर्षदेखि नेपालमा पारिवारीक संरक्षणवीहिन अवस्थामा रहेका र त्यस्तो जोखिममा पर्नसक्ने संभावना रहेका वालवालिकाको रेखदेख, स्याहार सुसार र उचित शिक्षा दिक्षा दिँदै सवल बनाई समाजमा पुर्नस्थापना गराउँदै आएको छ । १० कक्षा उतिर्ण, एकल, विधवा या पारपाचुके गरेका महिलालाई रोजगारी दिने उद्धेश्यले वालग्रामले शुक्रबार २५ जना त्यस्ता आमा र काकी खोजेको हो । एसओएस वालग्रामको सिद्धान्त अनुसार हरेक वालग्रामभित्र छोराछोरी र आमासहितको ‘मायालु पारिवारीक घर’ मा कम्तिमा ८ र बढीमा १० जना छोराछोरी रहने र तिनीहरुको रेखदेखका लागि एकजना आमा हुन्छिन भने आमा विदामा बसेको समयमा काकीले घर र छोराछोरी सम्हाल्ने गर्छिन ।

एसओएस वालग्राममा आमा या काकी भएर भित्रिएपछि उनीहरुलाई एउटा सिंगो परिवारको जिम्मेवारी दिइन्छ । उनले नै आफ्नो घरमा विभिन्न भुगोल, जातजाति, समुदायबाट आएका नवजात शिशुदेखि त्यहाँ रहेका अन्य वालवालिकाको सबै जिम्मेवारी सम्हाल्नुपर्छ । आश्रीत छोराछोरी १५ वर्षको हुँदासम्म तिनै आमाले घर रेखदेख गर्छिन भने त्यसपछि छोरा र छोरीलाई एसओएस वालग्रामको अलग अलग युवालयमा राखेर उच्च शिक्षा दिने गरिन्छ ।

आमा र काकीको पदमा निवेदन दिने महिलाहरुमा वालग्राममा आश्रीत वालवालिकालाई आफ्नै छोराछोरी सरह माया ममता दिँदै पालनपोषण र उचित शिक्षादिक्षा दिनसक्ने खुवी हुनुपर्ने एसओएस वालग्राम नेपालका राष्ट्रिय निर्देशक इश्वरीप्रसाद शर्मा बताउँछन ।
वालग्रामले मागेका २५ जना आमा र काकीले पहिला लिखीत परिक्षा उतिर्ण गर्नुपर्छ । त्यसपछि उनीहरुलाई मासिक ७ हजारको साथै बस्ने खाने सुविधासहित एसओएस तालीम केन्द्र काभ्रेमा ३ महिनासम्म सैद्धान्तिक तालीम दिइन्छ । त्यसबाट छनौट भएका आमा र काकीहरुलाई नेपालका १० वटा वालग्रामहरुमा ९ महिने प्रयोगात्मक तालीममा पठाइन्छ । त्यस अवधिमा उनीहरुले बस्न र खाने सुविधासहित मासिक १३ हजार पारिश्रमिक पाउँछन ।

३ महिने सैद्धान्तिक र ९ महिने प्रयोगात्मक तालीममा उतिर्ण आमालाई खाने र बस्ने सुविधासहित मासिक २५ हजार ६०० र काकीहरुलाई काकीहरुलाई मासिक २० हजार २०० पारिश्रमिक पाउँछन । यसका साथै वालग्रामले उनीहरुलाई सञ्चयकोष र औषधि उपचारको सुविधा पनि दिँदै आएको राष्ट्रिय निर्देशक शर्माले बताए । ती आमा र काकीहरुले केटाकेटीलाई गाली गर्न र कुट्न पाउँदैनन । पारिवारीक घरका छोराछोरी काकी र आमाको सम्पूर्ण खानपीन, शिक्षा, स्वास्थ्यको खर्च सबै वालग्रामले वेहोर्छ । वालग्राम भित्र रहेका अलग अलग घरमा आमा र काकी हुने गरेता पनि १० देखि १६ वटा पारिवारिक घरको बाबा (फादर)चाँही एकजना मात्रै हुन्छन, जसलाई वालग्रामको आयोजना निर्देशक भनिन्छ ।

एसओएस वालग्राम नेपाल अन्तर्गत नेपालभरी १० वटा वालग्राम रहेको छ भने ती वालग्राममा १४ देखि १६ वटासम्म पारिवारीक घर छ । नेपालका १० वटा वालग्राममा १ सय ३३ वटा पारिवारिक घर रहेको छ । एसओएस वालग्राम संसारभरी नै वालवालिकाको ‘मायालु पारिवारीक घर’को रुपमा परिचित रहेको छ । ६० वर्षको उमेरसम्म वालग्राममा आमा भएर काम गरि सेवा निवृत्त भएको र केही काकीहरुले स्वेच्छाले या व्यवहारिक कारणले गर्दा जागीर छोडेकोले सो ठाउँमा पदपुर्ति गर्न एसओएस वालग्राम नेपालले २५ जना आमा र काकी खोजेको हो ।

:258 Views

Leave a Reply