न्यू डायमण्ड, थ्रीस्टार र आयोजक एजे फाइनलमा, पुरस्कार राशिमा वृद्धि

भक्तपुर, ११ पुस । भक्तपुरमा जारी विद्यालयस्तरीय छात्रछात्रा भलिबल प्रतियोगिताको फाइनलमा न्यू डायमण्ड, थ्रीस्टार र आयोजक एजे स्कुल भिड्ने भएका छन् ।

भक्तपुरको सूर्यविनायक नगरपालिका वडा नं. ६ पाण्डुबजारस्थित आर्दश ज्योति (एजे) स्कूलले आयोजना गरेको विद्यालयस्तरीय पाँचौं एजे कप भलिबल प्रतियोगिताको मंगलबार भएको सेमिफाइलन खेलमा आफ्ना प्रतिद्वन्द्वीलाई पछि पार्दै छात्रातर्फ न्यू डायमण्ड र थ्रीस्टार स्कुल, छातर्फ थ्रीस्टार आयोजक एजे स्कूलले फाइनलको यात्रा तय गरेको हो ।

सेमिफाइनल अन्तर्गत छात्रा तर्फको खेलमा पारामाउण्ट र न्यू डायमण्डबीचको खेलमा न्यू डायमण्डले पारामाउण्टलाई सोझो सेटमा पराजित गरेको थियो ।

खेलमा न्यू डायमण्डले पारामाउण्टविरुद्ध २५–२१ र २५–११ अंक बटुलेको थियो । यसै गरी थ्रीस्टार र ख्पप कलेजबीचको खेलमा थ्रीस्टारले ख्वप कलेज विरुद्ध २५– ९ र २५–११ अंक हासिल गरी फाइलनमा पुगेको थियो ।

छात्रतर्फको सेमिफाइनलमा गीताञ्जलि थ्रीस्टारबीच भएको स्पर्धामा थ्रीस्टारले जीत हासिल गरेको थियो । स्पर्धामा थ्रीस्टारले गीताञ्जलिका विरुद्ध २५–२२ र २५–१९ को अंक हासिल गरी जीत निकालेको थियो ।

आयोजक एजे र श्रीपद्मबीचको खेलमा आयोजक एजेले श्रीपद्मलाई २५–२० र २५–२० को अंकका साथ सोझो सेटले पराजित गरेको थियो ।
विजयी टीमहरुले आआफ्ना प्रतिद्वन्द्वीलाई हार चटाउँदै फाइलनमा प्रवेश गरेको प्रतियोगिता संयोजक भलिबल खेलका राष्ट्रिय खेलाडी एवं रेफ्री रुकेश शाहीले जानकारी दिए ।

प्रतियोगितामा काठमाडौं उपत्यकाका तीन जिल्ला र काभ्रेका विद्यालयहरुसहित २० विद्यालयले सहभागिता रहेको थियो ।सरकारले भलिबल खेललाई राष्ट्रिय खेल घोषणा गरिसकेको अवस्थामा भलिबल खेलप्रति नयाँ पुस्ताको आर्कषण बढाउनका लागि गरिएको उपत्यकाव्यापी विद्यालयस्तरीय प्रतियोगितामा प्रथम, द्धितीय र तृतीय हुने विद्यालयलाई शिल्ड, मेडल, प्रमाणपत्रका साथै नगद पुरस्कारसमेतको व्यवस्था छ ।

आयोजकका अनुसार प्रतियोगितामा प्रथम, द्धितीय र तृतीय हुने टीमलाई प्रदान गरिने नगद पुरस्कारमा परिवर्तन गरिएको छ ।
विद्यालय व्यवस्थापन समितिका अध्यक्ष श्रीराम कुश्माले खेलकुदप्रति बढिरहेको आर्कषणलाई मध्यनजर गरी नगद पुरस्कारमा नगद राशी बढाइएको बताए ।

यसअघि प्रथम हुने टीमले रु. १० हजार, द्धितीय हुने टीमले रु. ५ हजार र तृतीय हुने टीमले रु. ३ हजार नगद पुरस्कार पाएकामा यो पटकदेखि भने प्रथम हुने टीमले नगद रु. पन्ध्रहजार, द्धितीय हुने टीमले १० हजार र तृतीय हुने टीमले ५ हजार पाउने छन् ।

गत पुस ७ गतेदेखि आयोजक विद्यालयको प्राङ्गणमा भइरहेको सो प्रतियोगिताको समापन कार्यक्रममा हालै थाइल्याण्डमा सम्पन्न विश्व शारीरिक सुगठन प्रतियोगिताका स्वर्णपदक विजेता महेश्वर मर्हजनलाई सम्मान गरिने विद्यालयका प्रिन्सिपल कृष्णराम दुवालले जानकारी दिए ।

:703 Views

Leave a Reply