पुलिस स्कुलको तीजमा थैली, टीका, चुरा र धागो उपहार

काठमाडौं । हिन्दु महिलाहरुको ठुलो पर्व तीजको अवसरमा नेपाल पुलिस स्कुल सामाखुसीका शिक्षिका र महिला कर्मचारीलाई पैसा राख्ने नेपाली परम्परागत थैलीको साथै महिलाहरुको शौभाग्यको प्रतीक टीका, चुरा र धागो उपहार दिइएको छ । अनावश्यक विषयमा पैसा खर्च नगरी वचत गरेर ‘थैलीमा जम्मा गर्न’ भन्दै थैली उपहार दिइएको थियो ।

नेपाल प्रहरीको कल्याण कोषद्वारा सञ्चालित सो स्कुलद्वारा तीजको अवसरमा विद्यालय प्रांगणमा आयोजित तीज विशेष कार्यक्रममा विद्यालयकी समादेशक, प्रहरी निरीक्षक हिमा थोकरले शिक्षिका र महिला कर्मचारीलाई थैली, टीका, चुरा र धागो उपहार दिएकी हुन ।
वर्षमा एकपटक आउने तीजको रौनक महिलाहरुमा धेरै नै हुने र यस अवसरमा दिइने सानोतिनो उपहारले पनि महिलाहरु खुसी हुने भएकोले विद्यालयले उनीहरुलाई सानै भएपनि उपहारको व्यवस्था गरेको हो ।

तीजकै अवसरमा विद्यालयले १ देखि ९ कक्षाका छात्राहरुलाई सहभागी गराई एकल र समूहगत तीज नृत्य प्रतियोगिताको आयोजना गर्यो । प्रतियोेगितामा एकल नृत्यतर्फ कक्षा ५ की सोनु थापा, कक्षा २ की प्रज्ञा तिवारी र कक्षा ५ कै मञ्जिला थापामगर क्रमशः पहिलो, दोस्रो र तेस्रो भए ।

यसैगरि समुहगत नृत्यतर्फ कक्षा ८ की प्रनिल घलेको समूह पहिलो, कक्षा ९ की सुजना स्यांग्बो समुह दोस्रो र कक्षा ६ की अपर्णा श्रेष्ठको समूह तेस्रो भएको थियो । नृत्य गुरुहरु मधु श्रेष्ठ, सविना पन्त र निरु महर्जन रहेको निर्णायक मण्डलले विजेताको छनौट गरेको थियो ।
नृत्यका विजयी विद्यार्थीलाई विद्यालयका प्रिन्सिपल हरिश भट्ट, विद्यालयकी समादेशक, प्रहरी निरीक्षक हिमा थोकर तथा वरिष्ठ पत्रकार बलराम प्यासीले पुरस्कार वितरण गरेका थिए ।

कार्यक्रममा छात्रा, शिक्षिका र महिला कर्मचारीमात्रै नभई छात्र, शिक्षक र पुरुष कर्मचारीहरुले पनि नाचगान गरि तीज मनाएका थिए भने विद्यालयले ती सबैलाई दर खुवाएर तीजको शुभकामना दिईएको थियो ।

:987 Views

Leave a Reply