बिहीबार र शुक्रबार स्कुल तथा कलेज बन्द

काठमाडौं १२ भदौ । गृह मन्त्रालयले उपत्यकाभित्रका सम्पूर्ण शैक्षिक संस्थालाई दुई दिन बिदा दिने निर्णय गरेको छ ।

बिहीवार र शुक्रबार काठमाडौंमा हुने चौथो बिम्स्टेक शिखर सम्मेलनलाई लक्षित गरी स्कुल तथा कलेजहरु पूर्ण रुपमा बन्द गर्ने गृह मन्त्रालयले निर्णय गरेको मन्त्रालयका सूचना अधिकारी एकदेव अधिकारीले जानकारी दिए ।

उनका अनुसार गृह मन्त्रायलमा आज बसेको शान्ति सुरक्षा महाशाखाको बैठकले बिहीवार र शुक्रवार बिदा दिने निर्णय गरेको हो । उनले उक्त दुई दिन अरु सरकारी कार्यालयमा भने बिदा नभएको बताए ।

‘विद्यालयमा दिइने बिदालाई अन्य बिदासँग समायोजन गनै सकिन्छ, अरु कार्यालयहरुमा त्यस्तो हुँदैन’, उनले भने, ‘ त्यहीकारण पनि स्कुल बिदा दिइएको हो, यतिमात्र नभएर सम्मेलन हुँदा जाम हुन्छ, जामका कारण विद्यार्थीलाई प्रेसर हुन्छ ।

त्यस्तै बुधवारदेखि तीन दिनसम्म सार्वजनिक तथा निजी सवारी जोर बिजोर नम्बरअनुसार संचालन गर्ने निर्णयसमेत गरिएको छ । राति १० बजेदेखि बिहान ६ बजेसम्म भने यातायातलाई कुनै मापदण्ड तोकिएको छैन ।