ईसिडी शिक्षकलाई बहिदारसरहको तलब माग

हरिसुन्दर छुकां/ भक्तपुर, २१ भदौ । शिक्षामन्त्री गिरिराजमणि पोखरेललाई १२ बुँदे ज्ञापनपत्र बुझाउँदै ईसिडी शिक्षकलाई निजामति कर्मचारीको बहिदारसरहको तलब दिन माग गरिएको छ ।

नेपाल क्रान्तिकारी शिक्षक संघले शिक्षा विकास तथा समन्वय एकाइ भक्तपुरमार्फत् शिक्षामन्त्री पोखरेसमक्ष उक्त माग गरेको संघका अध्यक्ष ज्ञानसागर प्रजापतिले जानकारी दिए ।

उनले विद्यालय शिक्षाभित्र समेटिएको बालविकास केन्द्र र केन्द्रमा आवद्ध सहयोगी कार्यकर्तालाई शिक्षकको मान्यता नदिएकोप्रति ध्यानाकर्षण गराउन शिक्षामन्त्रीसमझ ज्ञापन पत्र बुझाइएको बताए । उनले केन्द्रमा आवद्ध शिक्षकहरुको न्यूनत्तम तलब बहिदारसरह हुनुपर्ने विज्ञप्तिमा उल्लेख भएको जानकारी दिए ।

‘बाल विकास केन्द्रमा कार्यरत शिक्षकहरुलाई न्यूनत्तम पनि १८ हजार मासिक तलब हुनु जरुरी छ, त्यसले मात्र त्यो तहलाई बलियो बनाउन सकिन्छ ।’ उनले भने ।

शिक्षा प्रत्येक नागरिकको मौलिक अधिकार भएको उल्लेख गर्दै समाज विकासको लागि शिक्षाले आधारको काम गर्ने हुँदा शिक्षा राज्यको दायित्व भएको ज्ञापनपत्रमा उल्लेख छ ।

देशमा आधारभूत शिक्षा निःशुल्क र अनिवार्य भएको र पूर्व प्रावि तह पनि अब विद्यालयको अभिन्न अङ्ग भएको अवस्थामा पूर्व प्रावि तहमा कार्यरत जनशक्तिलाई सहयोगी कार्यकर्ता मात्र भनी शिक्षकको दर्जा पनि नदिइएको भन्ने गुनासो पनि उक्त ज्ञापन पत्रमा गरिएको छ ।

ज्ञापनपत्रमा निम्नानुसारका बुँदाहरू उल्लेख गरिएका छन् :
१. पूर्व प्रावि तह (बाल विकास दरबन्दी) मा काम गर्ने शिक्षकहरूको तलब निजामती सेवाका बहिदारसरह गरियोस् ।
२. पूर्व प्रावि तहमा काम गर्ने शिक्षकहरूको शैक्षिक योग्यता एसईई पूरा भएको गरियोस् ।
३. हाल कार्यरत एसईई अनुत्तीर्ण बाल विकास ‘सहयोगी कार्यकर्ता’ शिक्षकलाई ३ वर्षको मौका दिई एसईई पूरा गर्न अवसर दिइयोस् ।
४. ईसीडीमा कार्यरत शिक्षकहरूलाई विद्यालय समयमा (बिहान १०ः०० बजेदेखि दिउँसो ४ः०० बजेसम्म) विद्यालयमा नै बसी काम गर्न दिइयोस् ।
५. कार्यरत ईसीडीका शिक्षकहरूलाई प्रत्येक वर्ष पुनः ताजगी तालिम दिइयोस् ।
६. विद्यार्थी संख्याअनुसार प्रत्येक १५ जना विद्यार्थी बराबर एक शिक्षकको व्यवस्था गरियोस् ।
७. प्रत्येक पूर्व प्रावि तहको लागि कार्यालय सहयोगीस्तरको तलब भत्ता पाउने गरी आयाको व्यवस्था गरियोस् ।
८. बाल मनोविज्ञानअनुसारको शैक्षिक सामग्रीहरूको बन्दोबस्त गरियोस् ।
९. स्थानीय सरकार (मनपा, उमनपा, नपा र गाउँपालिका) र प्रदेश सरकारसमेतलाई शिक्षामा बजेट व्यवस्था गर्न सङ्घीय शिक्षा ऐन र नियमावली तुरून्तै जारी गरियोस् ।
१०. पूर्व प्रावि तहका विद्यार्थीहरूलाई दिवा खाजाको व्यवस्था गरियोस् ।
११. पूर्व प्रावि तहका शिक्षालाई विद्यालय पोशाक भत्ता र महँगी भत्ताका साथै पेशागत सुनिश्चितता प्रदान गरियोस् ।
१२. यस सङ्घद्वारा तत्कालीन माननीय शिक्षामन्त्री धनीराम पौडेललाई बुझाइएको ज्ञापनप्रति पुनः ध्यान दिइयोस् ।

ज्ञापनपत्र बुझ्दै शिक्षा विकास तथा समन्वय एकाइ प्रमुख हरिप्रसाद दाहालले ज्ञापनपत्र उल्लिखित बुँदाहरू जाजय भएको भन्दै छिट्टै ज्ञापनपत्र शिक्षामन्त्रीसम्म पु¥याउने वचन दिएका थिए ।

संघले सोही व्यवहोराको ज्ञापनपत्र भक्तपुर नगरपालिकाका नगर प्रमुख सुनिल प्रजापतिलाई पनि बुझाएका थिए ।

:7692 Views

Leave a Reply