स्कूल स्कूलमा चीनियाँ कला

भक्तपुर, २२ भदौं । चाइना कल्चर सेन्टर नेपालले विद्यालयमा चिनियाँ र नेपाली परम्परागत कला प्रदर्शनी गरेको छ । ‘फ्लावर अफ सिल्क रोड’ नामक परम्परागत कला प्रदर्शनी भक्तपुरको व्यासीस्थित एभरेस्ट इङ्लिश स्कुलमा गरेको हो ।
सो प्रदर्शनी च्याङ लीको नेतृत्वमा भएको हो । सोही कार्यक्रम यसअघि सिद्धार्थ बनस्थली इन्स्टिच्युट र होटल याक एण्ड यतिमा भएको थियो ।
आयो सेन्टरका संचालक इन खुन सोङ्गले एभरेस्ट स्कुल र चाइनिज कल्चर सेन्टरको लामो समयदेखि सम्बन्ध रहेको बताए । कार्यक्रममा चीनका परम्परागत संस्कृति झल्कने नृत्य, गायन, संगीत र मार्सल कला प्रदर्शन गरेका थिए । एभरेस्ट इङ्लिश स्कुलका विद्यार्थीले नेपाली गीतमा नृत्य र नेवारी नृत्य गरेका थिए । विद्यार्थीहरुले चाइनिज भाषामा गीत पनि गाएका थिए ।
चीनका लिउ यनयन, लिउ यिन, लिउ लुलु, च्याङ् हेव, यङ लिन, यङ जेन लगायत अन्यले त्यहाँको संस्कृति झल्कने विभिन्न कला देखाएका थिए । कार्यक्रममा डिप नाइट, द ब्यालेन्स अफ टुइन फोर्स, डबल साउथ बक्सीङ, माई सङ नामक कला प्रदर्शन भएका थिए । गायन र अन्य प्रस्तृतिका भाषा नबुझ्दा पनि विद्यार्थीहरुले कार्यक्रममा आफूहरुलाई रमाइलो लागेको बताए भने एभरेस्ट इङ्लिश स्कुलका संस्थापक प्रिन्सिपल भक्त राजभण्डारीले चीनियाँ भाषा संसारको पहिलो भाषा भएको बताए । ‘चीनसँग अन्तरसांस्कृतिक सम्बन्धबाट हाम्रो राष्ट्रको पर्यटन र आर्थिक पक्षलाई सुधार गर्न सकिन्छ ।’ उनले चाइनिज भाषाको महत्व बुझेर आफ्नो विद्यालयमा सो भाषाका कक्षा विगत ९ वर्षदेखि सञ्चालनमा ल्याएको जानकारी दिए ।
सो विद्यालयमा कक्षा ४ देखि ७ सम्म चीनियाँ भाषा पढाइ भइरहेको छ ।