परीक्षार्थीलाई सास्ती: शिक्षक परीक्षा केन्द्र निर्धारणमा बदमासी !

भक्तपुर । शिक्षक सेवा आयोगले सबै तहका शिक्षकको पदपूर्तिका लागि तोकेको परीक्षा केन्द्रमा बद्मासी गरेको शिक्षकहरुले आरोप लगाएका छन् । आयोगले परीक्षा केन्द्रका लागि फरक जिल्ला तोकेपछि परीक्षार्थीले आफूहरुलाई ‘सास्ती’ दिएको बताउँदै आयोगले बद्मासी गरेको आरोप लगाएका हुन् ।

‘महँगो भाडाका कारण प्लेन चढेर जानै समस्या हुने भयो,’ हुम्लाका स्थानीय पूर्णबहादुर शाहीले भने, ‘परीक्षार्थीको संख्या धेरै भएकाले टिकट पाउन समेत समस्या हुने देखिन्छ ।’ आगामी असोज ११, १२ र १३ गते हुने माध्यमिक तथा आधारभूत तहको लिखित परीक्षाको केन्द्र फारम भरेको जिल्लाभन्दा फरक जिल्लामा तोकिएपछि दुर्गमका परीक्षार्थीलाई असुविधा हुने उनको भनाइ छ ।

सुर्खेतबाट फारम भरेका परीक्षार्थीले प्रदेश नम्बर ५ को बाँकेबाट परीक्षा दिनुपर्ने भएको छ । कर्णाली प्रदेशका सुर्खेत र जाजरकोटका परीक्षार्थीका लागि बाँकेमा परीक्षा केन्द्र तोकिएको छ । सडक यातायातको सुविधा नभएका कर्णालीका हुम्ला र डोल्पाका परीक्षार्थीलाई हवाईजहाजमार्फत सुर्खेत आएर परीक्षा दिन जाँदा एकजना परीक्षार्थीकोे कम्तीमा ५० हजार खर्च हुने देखिएको छ ।

उनले खाना र बसाइमा समेत धेरै रकम खर्च हुने भएकाले परीक्षा बाहिर राखिनु अव्यावहारिक भएको बताए । हुम्लाबाट ६ सय ७१ परीक्षार्थीले शिक्षक सेवा आयोगको परीक्षामा प्रतिस्पर्धा गर्दै छन् ।

हुम्लाबाट फाराम भरेका सबै तहका परिक्षार्थीका लागि जिल्लामै परीक्षा केन्द्र तोक्न सांसद रङ्गमति शाहीले प्रतिनिधिसभामा माग गरेकी थिइन् । उनले शिक्षामन्त्रीलगायतका अधिकारीसँग भेटेर यसबारे ध्यानाकर्षण गराएको बताइन् । ‘कम्तीमा आधारभूत तहको परीक्षा केन्द्र जिल्लामै राख्न सकिन्थ्यो,’ उनले भनिन्, ‘बाहिर केन्द्र राखिँदा प्रतियोगी परीक्षाबाट बञ्चित हुने अवस्था आयो ।’

साबिक कर्णाली अञ्चलका ५ र दैलेखबाट फाराम भरेका परीक्षार्थीको केन्द्र सुर्खेत तोकिएको हो । विगतमा निमावि र मावि तहको शिक्षकका लागि सुर्खेत र प्राथमिक तहका लागि जिल्लामै केन्द्र तोकिएको थियो ।

दुर्गम क्षेत्रका परीक्षार्थीलाई असुविधा हुने भए पनि परीक्षाको मर्यादा कायम गर्न परीक्षा केन्द्र बाहिर राखिएको आयोगका उपसचिव दामोदर आचार्यले बताए । उनले ७७ जिल्लाबाट फारम भर्ने व्यवस्था गरिएको भए पनि सुरक्षा तथा यातायातको सुविधा हेरेर ३४ जिल्लामा मात्र परीक्षा सञ्चालन हुने जानकारी दिए ।