परीक्षामा सहभागी अस्थायीलाई स्थायी गर्नुपर्ने माग

काठमाडौं ३१ भदौ । संयुक्त अस्थायी–करार केन्द्रीय कमिटीले विद्यालय बन्द गर्नेदेखि नेपाल शिक्षक महासंघको समानान्तर समिति गठन गर्नेसम्मका कार्यक्रम सार्वजनिक गरेको छ ।

समितिको ११ औं पूर्ण बैठकले सो निर्णय गरेको समितिका अध्यक्ष हेमनाथ चौलागाईले बताए । विभिन्न मागहरु राखी आन्दोलन गरिरहेका उनीहरुको सो बैठकले सबै परीक्षामा सहभागी अस्थायीलाई स्थायी गर्नुपर्ने, .विभिन्न कारणले परीक्षा छुटेका र २०७२ असोज ३ पछिकालाई आन्तरिक गर्नुपर्ने, विभिन्न कारणले सेवाबाट बाहिरिने शिक्षकलाई औषधि उपचारसहित एकमुष्ट रकमसहित बिदा गर्नुपर्ने माग पनि अघि बढाएका छन् ।

सोही बैठकले आगामी असोज १५ र १६ गते सामुदायिक विद्यालयको पठनपाठन बन्द गरी आआफ्नो गाउँपालिका र नगरपालिकामा धर्ना तथा ज्ञापन पत्र बुझाउने, प्रदेश र स्थानीय तहमा संगठन थप विस्तार र मजबुत बनाउने, अस्थायी, राहत, उमावि, विद्यालय कर्मचारी, बालकोटा संयुक्त भई कार्यगत एकता गर्ने र चरणबद्द आन्दोलन गर्ने, संसदीय समितिका सदस्यहरुसँग छलफल गर्ने पनि निर्णय गरिएको बैठकमा सहभागी अस्थायी शिक्षक आन्दोलन समितिका ंसयोजक बेदराज अधिकारीले जानकारी दिए ।

बैठकमा अध्यक्ष हेमनाथ चौलागाई, र उपाध्यक्ष ज्योतिनारायण ढकाल र राहतको तर्फबाट अध्यक्ष खेमराज अधिकारी र उपमहासचिब डम्बर राईलगायतले आआफ्नो विचार राखेका थिए । उनीहरुले आन्दोलनलाई अझ अघि बढाउने र सरकारले आफ्ना मागहरुको सुनुवाइ गरे असोज २१ गते छ वटै घटकको आयोजनामा मार्कर, किताब तालाचाबी, र खातापाता, प्रअलाई बुझाई काठमाडौंमा संयुक्त प्रदर्शन गर्ने पनि जनाएका छन् । साथै बैठकले महासंघले शिक्षकको समस्या समाधानमा ठोस पहल नगरी शिक्षा मन्त्रालयको प्रवक्ता भईरहेको अवस्थामा समानान्तर महासंघ पनि बनाउने विषयमा सहमति गरेका छन् ।