महालक्ष्मी स्कुलमा सब ओभरसियरको पढाइ

ललितपुर २ असोज । ललितपुरको महालक्ष्मी नगरपालिका वडा नं. ८ लुभुस्थित महालक्ष्मी माविमा सब ओभरसियरको पढाइ हुने भएको छ ।

निजी विद्यालयहरुमा मात्र पढाइहुँदै आइरहेको प्राविधिक विषयमा ललितपुरका सामुदायिक विद्यालयमध्ये सो विद्यालयमा पहिलोपटक सो विषयको पठनपाठन हुने भएको हो । देशमा शैक्षिक बेरोजगारको संख्या बढिरहेको समयमा प्राविधिक शिक्षामार्फत् बेरोजगारी समस्या समाधानका लागि सो विषयको पठनपाठन गर्न लागिएको विद्यालयले जनाएको छ । विद्यालयका प्रधानाध्यापक नीलप्रसाद दुलालले प्राविधिक शिक्षा तथा व्यावसायिक तालिम परिषद्(सिटीइभिटी)बाट सो विद्यालयमा सब इञ्जिनियरिङ विषय पठनपाठनका लागि सम्बन्धन दिइएको जानकारी दिए ।

उनले न्यूनत्तम शूल्कमा सो विषयको पढाइ हुने र पढाइपछिमात्र नभएर पढाइसँगै पनि रोजगारीको अवसर सिर्जना हुने बताए । ‘ १८ महिने यो कोर्षका लागि न्यूनत्तम ४५ हजार खर्च हुन्छ, यो विषय पढ्नका लागि एसइइमा डी र इ ग्रेड आए पुग्छ ।’ उनले भने ।

प्रधानाध्यापक दुलालले १८ महिनाको समयावधिमध्ये १० महिना सैद्धान्तिक र प्रयोगात्मक कक्षा हुने र बाँकी  महिना भने अन द जब ट्रेनिङ(ओजेटी) हुने पनि बताए । ‘हामी अहिले ओजेटीसँगै विद्यार्थीले रोजगारी पाउने तरिकाले व्यवस्थापन गर्दैछौं ।’ उनले भने ।

सो विषय पठनपाठनका लागि आवश्यक शैक्षिक तथा भौतिक पूर्वाधारको मूल्यांकन, अनुगमन पछि सिटीइीभटीले सम्बन्धन दिएको थियो । सो विषयमा सम्बन्धन दिएसँगै सो क्षेत्रका स्थानीय खुसी भएका छन् ।