विद्यालय कर्मचारीहरुको काठमाडौंकेन्द्रीत आन्दोलन सुरु, सिँहदरबार घेर्न पनि पछि नपर्ने

काठमाडौं २ असोज । आफूहरुमाथि चरम शोषण भएको भन्दै विद्यालय कर्मचारीहरु आन्दोलित भएका छन् ।

यसअघि पूर्वनिर्धारित कार्यक्रम अनुसार आफ्ना माग पूरा गराउन कालो पट्टी बाँधेर काम गरेका उनीहरुले मंगलबार भने राजधानीमा प्लेकार्डसहित प्रदर्शन गरेका छन् ।

सर्वाेच्च अदालतले २०६७ सालमा विद्यालय कर्मचारीहरुको सेवा, शर्त र सुविधा निश्चित गरि सेवा कानुन बनाई लागु गर्नु भनि दिएको आदेश कार्यान्वयन नभएको र शिक्षा ऐनमा कर्मचारीहरुलाई झुक्याउने गरि अस्पष्ट व्यवस्था गरिएको भन्दै आन्दोलन थालेका उनीहरुको मागलाई सरकारले सुनुवाइ नगरेपछि राजधानीमा आएर प्रदर्शन गरिएको उनीहरुको भनाइ छ ।

संघीयता अनुरुपको शिक्षा ऐन बनाउँदा सबै कर्मचारीहरुको न्याय र संरक्षण हुनेगरी ऐन बनाउनुपर्ने, बिगतमा बिद्यालय कर्मचारीका संघ संगठनहरुसंग भएका सम्झौता, सहमतिहरु कार्यान्वन गर्नुपर्ने मागका साथ नेपाल विद्यालय कर्मचारी संयुक्त आन्दोलन परिचालन समितिले आन्दोलन चर्काएको हो ।

सो आन्दोलनमा सामुदायिक बिद्यालयमा कार्यरत बिद्यालय कर्मचारीहरु क्रमशः लेखापाल, कार्यालय सहायक, सहयोगी, लाइब्रेरियन, स्वीपर, गार्ड, पालेलगायतको सहभागिता छ ।

उनीहरुले शिक्षा ऐन आठौ ( संशोधन ) कार्यान्वन नगरी संघीय शिक्षा ऐनमा बिद्यालय कर्मचारीहरु मुद्दालाई नसमेट्ने षड्यन्त्र भइरहेकोले पनि राजधानीकेन्द्रीत आन्दोलन गर्न बाध्य भएको जनाएका छन् ।

आजबाट काठमाडौंमा सुरु भएको आन्दोलनअन्तर्गत उनीहरुले असोज ६ गतेसम्म धर्ना, दबाब दिने कार्यक्रम तय गरेका छन् ।

आन्दोलनरत पक्षको मागलाई सरकारले सुनुवाइ नगरे आमरण अनशन बस्ने तयारी समेत भइरहेको र सिंहदरबारलक्षित कार्यक्रम समेत गर्ने उनीहरुको भनाइ छ ।

:2111 Views

Leave a Reply