शिक्षक परीक्षाको तयारी पूरा, परीक्षामा नयाँ व्यवस्था

भक्तपुर । आगामी बिहीबार अर्थात् असोज ११ गतेदेखि १३ गतेसम्म सञ्चालन हुने शिक्षक परीक्षामा १२ हजार ७३९ पदका लागि करीब दुई लाख ७५ हजार परीक्षार्थीले स्पर्धा गर्ने भएका छन् ।

प्राविमा एक लाख ५५ हजार, निमाविमा ८१ हजार र माविमा ३९ हजार परीक्षार्थी सहभागी हुँदैछन् । परीक्षालाई मर्यादित बनाउनका लागि जुन जिल्लाबाट परीक्षा फाराम भरेको हो सोही जिल्लाबाट परीक्षा दिन नपाइने नयाँ व्यवस्था गरिएको छ ।

परीक्षा सञ्चालनका लागि एक हजार २ सय ३२ केन्द्राध्यक्ष र दुई हजार ४ सय ६४ सहायक केन्द्राध्यक्षसहित करीब १४ हजार कर्मचारी आवश्यक पर्ने भएको शिक्षक सेवा आयोगले जनाएको छ ।

परीक्षा सञ्चालनको सबै तयारी पूरा भएको आयोगका प्रशासकीय प्रमुख डा. तुलसी थपलियाले बताए ।

परीक्षा सञ्चालनको सबै काम सकिएको जनाउँदै उनले परीक्षार्थीलाई ढुक्क भएर परीक्षामा सामेल हुन परीक्षार्थीलाई समेत आग्रह गरेका छन् ।
असोज ११ गते माध्यमिक तह, १२ गते निम्नमाध्यमिक तह र १३ गते प्राथमिक तहको परीक्षा हुँदैछ । उनका अनुसार सबै परीक्षा केन्द्रमा उत्तरपुस्तिका पठाइसकेको छ भने प्रश्नपत्र परीक्षा हुनुभन्दा एक दिन अगाडि मात्र पुग्ने छ ।

परीक्षाको तयारीको शनिबारदेखि सोमबारसम्म शिक्षा विकास तथा जिल्ला समन्वयका प्रमुख र केन्द्राध्यक्षलाई परीक्षा सञ्चालन र व्यवस्थापनसम्बन्धी तालीमसमेत दिइएको छ । परीक्षामा ३४ जिल्लामा एक हजार २३२ परीक्षाकेन्द्र निर्धारण गरिएको छ ।

:2482 Views

Leave a Reply