सबैलाई दशैं लागेको छ तर शिक्षा क्षेत्रमा दसा लागेको छ

शिक्षा क्षेत्र रोइरहेको छ । सबैलाई दशैं लागेको छ तर शिक्षा क्षेत्रमा दसा लागेको छ । सरकारी विद्यालयहरुको मात्रै कुरा गर्ने हो भने करिब तीन लाख जनशक्तिमध्ये असी हजारको हाराहारीमा रहेको स्थायी शिक्षकहरुको एउटा झुण्डले सत्ताको गुलामी गर्न मै ब्यस्त छ ।

बाँकी अस्थायी, राहत, उच्च मा.वि., बालविकास सहयोगी, लेखापाल, परिचर सबै आन्दोलनमा हुनुहुन्छ । एउटा उर्जाशिल उमेर अस्थायी र करार जागिरमा खर्चिएको करिब सवा दुई लाखको हराहारीमा रहेको यो अस्थायी, करार जनशक्तिको चिन्ता भनेकै पहिलो सेवाको सुरक्षा अनि पूरा तलब नै हो ।

चाडबाडको रौनकले सबैतिरबाट च्यापिरहेको बेलामा पनि काठमाडौंका सडकहरुमा भोकै पेट आन्दोलन गरिरहनु भएका मित्रहरुको कोलाहलले अझै सत्ताधारीहरुको मन छुन सकेको छैन । शिक्षा क्षेत्रमा कार्यरत दुई तिहाई बढी जनशक्तिको रोदन सुन्न र देख्न नसकेको सरकारका प्रतिनिधित्व गरेका भनाउँदाहरुले भाषण भने गर्न छोड्नुहुन्न, गुणस्तरीय शिक्षा भएन भनेर ।

ती अन्धा अनि बैरा नेताहरुलाई भोको पेटले हलो जोतिदैन भन्ने कुराको हेक्का भएकै हुनुपर्ने हो । राज्यको आवश्यकताले राखिएको जनशक्तिको यत्रो अपमान र अन्यायको जति नै बिरोध गरेपनि कम हुन्छ । तसर्थ मित्रहरु अब रुन छोडौं, संयुक्त अस्थायी, करार संघर्ष समिती बनाउनेतर्फ नेतृत्वमा रहनु भएका मित्रहरुले पहल गरौं । भाइ फुटे गवाँर लुटे, चेतना भया ।

:1239 Views

Leave a Reply