‘माली’देखि ‘गाली’सम्म शिक्षक

शिक्षकप्रति गरिएको नकारात्मक टिप्पणी, शिक्षकलाई गरिने गालीबाट दिक्क छिन् भोजपुरको राधाकृष्ण माविका अँग्रेजी शिक्षक सीता तिवारी । वि.सं. २०७१ सालदेखि शिक्षण पेशामा आवद्ध उनी भोजपुरको तिवारी भञ्ज्याङमा बस्छिन् ।

शिक्षककै कारण विभिन्न पेशाका लागि योग्य भए पनि शिक्षकप्रति हेरिएको नजर, शिक्षकलाई गरिएको व्यवहारले राम्रो गरिरहेका शिक्षकलाई नराम्रो हुने उनको अनुभव छ । सोही अनुभवका आधारमा उनले शिक्षकलाई नै केन्द्रमा राखी गजल रचना गरेकी छन् ।

अँग्रेजी साहित्यकी विद्यार्थी भए पनि नेपाली साहित्यमा रुचि राख्ने उनको गजल साताको शिक्षा साहित्यमा :

सीता तिवारी

फूलबारीको फूल रक्षक माली हो शिक्षक
गाउँ, समाज, राष्ट्र बोक्ने थाली हो शिक्षक ।

युग हाँक्ने विश्वास पात्र भरोसाको खम्बा
अबोध ती बालकको लाली हो शिक्षक ।

ज्ञान, सीप, कलाबाट आफू पोखिएर
सभ्यतालाई जोगाउने आली हो शिक्षक ।

डक्टर, पाइलट, मन्त्रिहरु जो जो बने पनि
सबैभन्दा बढी शक्तिशाली हो शिक्षक ।

सेकेण्ड, मिनेट, घण्टासँगै दौडिरहे पनि
सजिलो छ सबले गर्ने गाली हो शिक्षक ।