एउटा स्कुल :तीन हेडमाष्टर, शिक्षक भने तलबविहीन

काठमाडौं । नगरपालिकाले तलब रोकेपछि पशुपति माविका शिक्षकले विद्यालयमा तालाबन्दी गरेका छन् ।

आफूहरुले पढाउँदै आए पनि लामो समयदेखि तलब नपाएको भन्दै सिराहाको लहानस्थित सो विद्यालयका शिक्षकहरुले आइतबार विद्यालयमा तालाबन्दी गरेका हुन् ।

‘दशैँको मुखमा समेत हामीले तलब पाएनौं, हेडसरहरुको आआफ्नै दाबीको सिकारमा हामी परेका छौं, त्यसकैको विरोधमा हामीले तालाबन्दी गरेका हौं ।’ एक शिक्षकले भने ।

उनका अनुसार विद्यालयको प्रशासन कोठा, प्रधानाध्यापकको कार्यकक्षमा तालाबन्दी भएको छ ।

अहिले सो विद्यालयका शिक्षकहरु क्रमशः परमेश्वर राय, सोवितलाल यादब र रामकुमार साहबीच को प्रधानाध्यापक बन्ने भन्ने कुराको विवाद रहेको छ । सबैले आफू नै प्रअ बन्नुपर्ने दाबी गर्दै आएका छन् भने एकले अर्काविरुद्ध अदालतमा मुद्धा पनि राखेका छन् ।

सोही कारण विद्यालयको आयव्यय पनि दुरुस्त नभएपछि नगरपालिकाले तलब निकासा नगरेको नगरपालिका स्रोतले जनाएको छ । स्रोतका अनुसार परमेश्वर रायले सोही विद्यालयका शिक्षक सोवितलाल चौधरीलाई निमित्त प्रअ दिएपछि विवाद सुरु भएको थियो ।

सो विवाद सुरु भएपछि नगरपालिकाले भने सोही विद्यालयका शिक्षक रामकुमार साहलाई प्रअको पत्र दिएर प्रअ तोकेको थियो । त्यसरी नगरपालिकाले साहलाई प्रअ बनाएपछि पुनः परमेश्वर रायलले अदालतबाट स्टे अर्डरको पत्र लिएर प्रअ हुन आएपछि विवाद उत्कर्षमा पुगेको स्रोतको भनाइ छ ।

शिक्षकले आफूहरु तलब नपाएसम्म विद्यालयमा तालाबन्दी र पठ्नपाठन नगर्ने बताएका छन् । यता विद्यालयका प्राध्यनाध्यापक प्रमेश्वर रायले आवश्यक सम्पूर्ण प्रक्रिया तयार पारेर लहान नगरपालिकामा बुझाए पनि तलब निकासा नगरेकाले शिक्षकहरुलाई तलब उपलब्ध गराउन नसकिएको बताए ।

स्रोतव्यक्ति काशिन्द्रप्रसाद यादव तथा लहान नगरपालिकाका प्रशासकीय अधिकृत तिर्थराज भट्टराईले विद्यालयले विगत लामो समयदेखि आयव्यय नबुझाएको र हिसाब पारदर्शी नभएकाले नगरपालिकाले तलब रोकेको बताए ।