विद्यालयलाई २ रोपनी ७ आना जग्गा उपहार

भक्तपुर । भक्तपुरको नंखेलस्थित सरस्वती माध्यमिक विद्यालयले २ रोपनी ७ आना क्षेत्रफल जग्गा पाएको छ ।

लामो समयदेखि जग्गा अभाव खेपिरहेको सो विद्यालयले स्थानीय जग्गादाताहरु क्रमशः शंकर तामाङ र देवबहादुर तामाङले जग्गा उपलब्ध गराएको विद्यालयका प्रधानाध्यापक परशुराम राईले जानकारी दिए ।

‘हामीले स्थानीय समाजसेवी शंकर तामाङबाट २ रोपनी, देवबहादुर तामाङबाट ३ आना २ पैसा र अर्का एक स्थानीयबाट ३ आना २ पैसा गरी २ रोपनी ७ आना जग्गा पाएका छौं,’ प्रअ राईले भने, ‘त्यसले भवन बनाउनका लागि हामीलाई ठाउँ उपलब्ध भएको छ ।’

उनले सो जगामा अहिले ८ कोठे भवन बनिरहेको जानकारी दिए । सो भवनका लागि जिल्लास्थित पूनर्निर्माण प्राधिकरणबाट रु. १ करोड १४ लाख रकम प्राप्त भएको छ ।

सूर्यविनायक नगरपालिका वडा नं. ९ नंखेलको दुर्गम भेगमा रहेको काँक्राबारीमा सो भवन बनेपछि अभिभावक, शिक्षक खुुसी भएका छन् ।