फुटबल प्रतियोगितामा भिमेश्वरका शिक्षक प्रथम

काठमाडौं । एनप्याब्सन कागेश्वरी मनोहरा नगर कमिटीको आयोजनामा ‘पहिलो एनप्याब्सन अन्तरस्कुल टिचर फुटबल टुर्नामेन्ट’ भएकोे छ ।

शारिरीक र मानसिक स्फुर्ति बढाउन र एनप्याब्सनको स्कुलबीच भावनात्मक सम्बन्धको विकास गराउन सो कार्यक्रमको आयोजना गरिएको नगर समितिको अध्यक्ष अमृत खड्काले जानकारी दिए । ‘सधँै विद्यार्थीमा मात्र अतिरिक्त क्रियाकलापमा जोड दिएकोमा यो वर्ष शिक्षकको खेलमा पनि ध्यान दिएका हौं ।’ उनले भने ।

बुधबारबाट सुरु भएको प्रतियोगिताको फाइनल बिहीबार भएको थियो । प्रतियोगितामा काडाँघारीको भिमेश्वर एकेडेमी प्रथम र सिनामंगलको इस्टप्वाइन्ट बोर्डिङ स्कुल दोस्रो भएका थिए । प्रथम हुने विद्यालयलाई ट्रफी र नगद रु. २० हजार तथा द्वितीय हुने विद्यालयलाई ट्रफी र नगद रु. १० हजार पुरस्कार दिइएको थियो ।

सो पुरस्कार एनप्याब्सन प्रदेश नं. ३ का उपाध्यक्ष प्रकाश खड्काले प्रदान गरेका थिए । स्पर्धामा १६ वटा विद्यालयको सहभागिता रहेको थियो ।