खेल १३, सहभागी एकहजार ४ सय १४

भक्तपुर । जिल्लाको भक्तपुर नगरपालिकाले आइतबारदेखि नगरव्यापी विद्यालयस्तरीय खेलकुद प्रतियोगिता सुरु गरेको छ ।

विद्यार्थीहरुलाई खेलको बारेमा जानकारी दिन, खेलको महत्व बताउन शारिरीक तवरले तन्दुरुस्त बनाउने उद्देश्यका साथ नगरपालिकाले आफ्नो पालिका क्षेत्रभित्रका विद्यालयबीच प्रतियोगिता गरेको हो । सो प्रतियोगिता अन्तर्गत १३ वटा विभिन्न खेलहरुमा विद्यार्थीहरुले स्पर्धा गर्ने छन् ।

नगरपालिकाले भलिवल, कराँते, उसु, टेवुलटेनिस, बुद्धिचाल, फुटसल, पोर्टबल, कसिमला पायँ, खो खो, कबड्डी, तेक्वाण्डो, एथलेटिक्स र ब्याडमिन्टन गरी १३ खेलमा विद्यार्थीबीच स्पर्धा गराउने भएका हुन् ।

आयोजक पालिकाका अनुसार ६१ विद्यालयका १ हजार ७ सय १४ विद्यार्थीहरुले प्रतियोगितामा सहभागिता जनाएका छन् ।

खेलमा एक हजार १ सय ८ छात्र र ७ सय ६ जना छात्राको सहभागिता रहेको छ ।

नगरपालिकाभित्र रहेका ९२ वटा विद्यालयहरुमध्ये ६१ वटाले मात्र सहभागिता जनाएको पनि कार्यक्रम उद्घाटनको क्रममा जानकारी दिइएको थियो ।

खेलहरु शहीद स्मृति खेलमैदान, ख्वप कलेज, बागीश्वरी कलेज, आदर्श आजाद कलेज, पद्म कलेज, वीरेन्द्र सैनिक आवासीय मावि, बाल विकास स्कूललगायातका स्थानमा हुने भएका छन् ।

भक्तपुर नगरपालिकाको आयोजनामा नगरव्यापी विद्यालय स्तरीय विभिन्न खेलकुद प्रतियोगिताको उद्घाटन नेपाल मजदुर किसान पार्टीका केन्द्रीय अध्यक्ष नारायणमान विजुक्छेंले गरेका थिए । सोही अवसरमा आयोजक नगरपालिका प्रमुख सुनिल प्रजापति, प्रदेश सभा सभासद् सुरेन्द्रराज गोसाईं, उपप्रमुख रजनी जोशी, प्रमुख जिल्ला अधिकारी नारायणप्रसाद भट्ट, प्रहरी उपरिक्षक हिमालकुमार श्रेष्ठ लगायतले खेलबारेमा चर्चा गरेका थिए ।

प्रतियोगिताका खेलहरु कार्तिक १७ गतेसम्म हुनेछन् ।