शिक्षकको धर्ना ३० गते , धर्नामा गएका शिक्षकलाई काजको व्यवस्था !

काठमाडौं । शिक्षक आन्दोलनमा प्रत्येक विद्यालयबाट शिक्षकको सहभागिताको लागि नेपाल शिक्षक महासंघले ‘उर्दी’ जारी गरेको छ ।

वर्तमान शैक्षिक अवस्थाको सुधार तथा नेपाली शिक्षकहरुको पेशागत हकहितको सुनिश्चितताका लागि महासंघको नेतृत्वमा विभिन्न चरण र प्रकृतिका कार्यक्रमहरुमार्फत् सम्बन्धित सरोकारवालाहरुको ध्यानाकर्षण गराउने कार्यक्रमहरु गरिररहेको दाबी गरेको महासंघको तेस्रो चरणको कार्यक्रमअन्तर्गत ७७ वटै शिक्षा विकास तथा समन्वय एकाइमा दिइने मागपत्र बुझाउनका लागि ‘उर्दी’ जारी पाइएको छ ।

संघले यही कार्तिक ३० गते शुक्रबार साविकको जिल्ला शिक्षा कार्यालय र हालको समन्वय एकाइमा मागपत्र दिँदैछ ।

विद्यालय र प्रधानाध्यापक तथा शिक्षकहरुलाई शैक्षिक क्षेत्रमा शिक्षक महासंघले चाहेको सुधारका क्षेत्रहरु तथा पेशागत हितको सुनिश्चिततासम्बन्धि मागपत्र सार्वजनिक गर्ने र हरेक शिक्षकहरुलाई जानकारी गराउने गरी एक–शिक्षकःएक–मागपत्र अभियान कार्यक्रम गरिसकेको छ ।

कार्यक्रमअन्तर्गतै कार्तिक ३० गते साङ्केतिक विरोध स्वरुप बिहान १० बजेदेखि दिउँदो २ बजेसम्म धर्ना दिने कार्यक्रम तय गरेको छ । ‘सो कार्यक्रममा शिक्षकहरुको उपस्थिति बाक्लो होस् भनेर महासंघले एक प्रकारले उर्दी नै जारी गरी शिक्षक उपस्थिति गराउन भनेको छ ।’ एक प्रधानाध्यापकले बताए ।

आन्दोलनअन्तर्गत धर्नामा गएका शिक्षकहरुलाई काजको व्यवस्था गरिदिनका लागि प्रधानाध्यापकहरुमा अनुरोध गर्दै शिक्षक महासंघ कास्कीका अध्यक्ष तिर्थराज ढकालले सामाजिक सञ्जालमार्फतै अनुरोध गरेका छन् ।