सानैदेखि छात्रालाई पनि छात्र सरह खेल खेलाउनु आवश्यक

काठमाडौं । एन्फाको महिला कमिटीका अध्यक्ष बिन्द्रा देवानले छात्रालाई पनि छात्रलाई जसरी सानैदेखि खेलमा सहभागी गराउनुपर्ने बताएकी छिन् ।

नुवागी मिडियाले आयोजना गरेको विद्यालयस्तरीय तेस्रो फुटसल प्रतियोगितामा उनले छात्रा खेलकुदमा केन्द्रित हुन आवश्यक रहेको बताउँदै भनिन्, ‘महिलालाई फुुटबलमा अगाडि बढाउन कक्षा १ बाटै फुटबल खेलाउनुपर्छ ।’

भक्तपुर प्याब्सन अध्यक्ष श्रीकृष्ण केसीले पनि खेलकुदलाई अगाडि बढाउन विद्यालयस्तरबाट नै खेलाडी तयार बनाउनुपर्नेमा जोड दिए । ‘खेलकुदलाई राम्रो बनाउन एन्फाले पनि विद्यालयस्तरको खेल सञ्चालन गर्नु आवश्यक छ ।’ उनले सुझाव दिए ।

विद्यार्थीलाई शारिरीक तथा मानसिक रुपमा स्फुर्त बनाउन र खेलकुदमार्फत् व्यक्तित्व विकासमा सहयोग पुर्याउने हेतुले गत कात्तिक २९ देखि मंसिर १ गतेसम्म भएको फुटसल प्रतियोगितालाई ३ समूहमा विभाजन गरिएको थियो । कक्षा ११ र १२ को ९, कक्षा ६ देखि १० सम्मको छात्रमा २३ र छात्रामा ८ वटा समूहबीच प्रतिस्पर्धा भएको थियो ।

स्पर्धामा पहिलो, दोस्रो र तेस्रो भएका स्कुललाई एन्फा महिला कमिटीका अध्यक्ष बिन्द्रा देवानले पुरस्कार प्रदान गरेकी थिइन् । उनले महिलाको खेलमा सहभागी रहेकोमा खुसी व्यक्त गर्दै भनिन्, ‘छात्रालाई खेलमा अझ प्रोत्साहन गर्नुपर्छ र कक्षा ८ बाट भन्दा, कक्षा १ बाट नै छात्रालाई फुटबल खेलाउनुपर्छ ।’

कक्षा ११ र १२ को छात्रतर्फको खेलमा सिबर्ड इन्टरनेशनल स्कुल पहिलो, आदर्श जनप्रेमी सेकेण्डरी स्कुल दोस्रो र ग्लेसियर इङ्लिश स्कुल तेस्रो भएको छ । सो खेलमा उत्कृष्ट खेलाडीमा सिबर्ड स्कुलको छात्र सपन बस्नेत र उत्कृष्ट गोल किपरमा आदर्श जनप्रेमी स्कुलको छात्र पारस खत्री भएका थिए ।

कक्षा ६ देखि १० सम्मको छात्रतर्फको खेलमा प्रथम, द्वितीय र तृतीयमा क्रमशः इमानुयल इङ्लिश सेकेण्डरी स्कुल, कौस्तुभ ऐकेडेमी र सुप्रिम एकेडेमी हुन सफल भएको छ । जसमा उत्कृष्ट खेलाडीको उपाधि कौस्तुभ स्कुलका राजन तामाङ र उत्कृष्ट गोल किपरमा इमानुयल स्कुलका छात्र अमर श्रेष्ठले पाएका थिए ।

छात्रातर्फको कक्षा ६ देखि १० सम्मको फुटसलमा हाईभ्यु स्कुल पहिलो, अमिनिटि स्कुल दोस्रो र आदर्श जनप्रेमी सेकेण्डरी स्कुल तेस्रो भएको छ । सो विधाअन्तर्गत अमिनिटिकी छात्रा सुनिता बस्नेत उत्कृष्ट खेलाडी भइन् भने हाईभ्यूकी छात्रा कृषा अमात्य, उत्कृष्ट गोलकिपर ।

स्पर्धामा प्रथम, द्वितीय र तृतीय भएका विद्यार्थीलाई शिल्ड, मेडल, प्रमाणपत्र र सहभागी विद्यालयलाई प्रमाणपत्र वितरण गरिएको थियो । गठ्ठाघरको प्रोमोशनल फुटसलमा भएको प्रतियोगितामा भक्तपुर, काठमाडौं र ललितपुरका स्कुलहरुको सहभागिता थियो ।