गाडीबाटै शिक्षामन्त्रीको दाबी :चारदिनभित्र संघीय शिक्षा ऐनको मस्यौदा

काठमाडौं । शिक्षा विज्ञान तथा प्रविधि मन्त्री गिरिराजमणि पोखरेलले मंसिर ८ गतेसम्मका संघीय शिक्षा ऐनको मस्यौदा तयार हुने बताएका छन् ।

बुधबार दिउँसो आयोगको थिमेटिक समूहको बैठकमा जान लागेका मन्त्री पोखरेलले गाडीबाटै भने, ‘पहिलो मस्यौदा पछि ८ गतेसम्ममा तयार भइसक्छ । त्यसपछि यसलाई हामी प्रादेशिक रुपमा छलफलमा लैजान्छौं । मंसिरभरीमा हामीले पार्लियामेन्टमा लग्ने तयारी गरिसक्छौं ।’
उनले ऐनको अन्तिम तयारीका लागि जुटिरहेको बताउँदै थपे, ‘आठ गतेभित्र एउटा ड्राप्ट आउँछ । त्यसको तयारी अन्तिम पुगिसकेको छ, आयोगको थिमेटिक समूहको बैठकको समूहमा जाँदैछु ।’

मन्त्री पोखरेलका अनुसार ऐनका लागि गठन भएका आठवटा विषयगत समितिले लेख्ने काम सकाएका छन् । त्यसैको अन्तिम बैठकमा जाँदै गरेका उनले टेलिफोनमा संक्षिप्त कुराकानी गर्दै भने, ‘त्यही समूहको अन्तिम बैठक आज हुँदैछ । त्यो बैठक सकिएपछि एक्सन प्लान तयार हुन्छ ।’

संविधानअनुसार आगामी फागुन २० भित्र संघीय शिक्षा ऐन जारी भइसक्नुपर्छ । मन्त्री पोखरेलले मंसिरभित्र सबै प्रक्रिया पूरा गर्ने दाबी गरे ।
सरकारले गत असोजमा ‘अनिवार्य तथा निःशुल्क शिक्षासम्बन्धी ऐन, २०७५’ जारी गरेको छ । संविधानको मौलिक हक र कर्तव्य दफा ३१ (२) मा ‘प्रत्येक नागरिकलाई राज्यबाट आधारभूत तहसम्मको शिक्षा अनिवार्य र निःशुल्क तथा माध्यमिक तहसम्मको शिक्षा निःशुल्क पाउन हक हुनेछ’ उल्लेख भएअनुसार उक्त ऐन जारी गरिएको हो ।

:1394 Views

Leave a Reply