नीजि विद्यालयका विकृति अन्त्य गर्ने अभिभावक संघको घोषणा

भक्तपुर । नेपाल राष्ट्रिय अभिभावक संघ भक्तपुर जिल्ला कार्यसमितिको पहिलो वैठकले भक्तपुरमा सञ्चालित विभिन्न नीजि विद्यालयभित्रका विकृति र विसंगती अन्त्य गर्ने घोषणा गरेको छ भने सामुदायिक विद्यालयको शैक्षिक गुणस्तर उकास्न सहयोग गर्ने निर्णय गरेको छ ।

संघका जिल्ला अध्यक्ष नवराज काफ्लेको अध्यक्षतामा विहीबार बसेको संघको पहिलो वैठकले सो निर्णय गरेको हो । गत असोजमा सम्पन्न अधिवेशनले काफ्लेको अध्यक्षतामा जिल्ला संघ गठन गरेको थियो ।

वैठकले जिल्लाको लागि ९ सदस्यीय सचिवालय, ५ सदस्यीय सल्लाहकार समिति र विभिन्न ६ वटा विभाग पनि गठन गरेको छ ।

जिल्ला अध्यक्ष काफ्ले अध्यक्ष रहने गरि गठन गरिएको ९ सदस्यीय सचिवालयमा चन्द्रप्रसाद अधिकारी र मञ्जु बराललाई थपिएको छ भने ५ सदस्यीय सल्लाहकार समितिमा अधिवक्ता प्रभाकर खनाल, रघुनाथ पौडेल, बद्री तिवारी,बासुदेव खड्का र सीता सुवेदीलाई मनोनित गरिएको छ ।

सैगरि विनु गोदार थापाको संयोजकत्वमा महिला विभाग,शरु बानियाँको संयोजकत्वमा संगठन विभाग, डिल्लीराम गौतमको संयोजकत्वमा प्रचार विभाग, प्रतिक्षा शर्माको संयोजकत्वमा सुझाव संकलन तथा परामर्श विभाग, उत्तम थापाको संयोजकत्वमा सामाजिक सम्पर्क विभाग र जानुका फुयाँलको संयोजकत्वमा आर्थिक विभाग गठन गरिएको छ ।

यसैगरि भक्तपुरको १ नं निर्वाचन क्षेत्र हेर्ने जिम्मेवारी शरु बानियाँलाई दिइएको छ भने २ नं निर्वाचन क्षेत्रको जिम्मेवारी डिल्लीराम गौतमलाई दिइएको छ ।

यसका साथै जिल्लामा रहेका ४ वटै नगरपालिका, सुर्यविनायक नगरपालिका, चांगुनारायण नगरपालिका, भक्तपुर नगरपालिका र मध्यपुर ठिमी नगरपालिकामा रहेका विद्यालयहरुको अनुगमन, निरीक्षण लगायत सुधारको लागि छिट्टै नै नगर समिति बनाइने जिल्ला अध्यक्ष नवराज काफ्लेले बताउनुभयो ।