विद्यार्थी अनुभव : अतिरिक्त क्रियाकलाप भइरहनु पर्छ

आस्था तिमल्सिना

घर पहिलो पाठशाला हो भने विद्यालय दोस्रो। विद्यालयमा हामीले औपचारिक र अनौपचारिक तरिकाले ज्ञान सिक्छौँ । पढ्ने र पढाउने काम र सिक्ने सिकाउने अझ गर्ने गराउने काम पनि विद्यालयमा नै हुन्छ ।

मंसिर ८ गते शनिवारको दिन थियो तर पनि विद्यालय बन्द थिएन । विद्यालय खुल्ला हुनुको कारण थियो, ‘जुगल स्काउट प्रदर्शनी २०७५’ । त्यस दिन हामी ३३ वटा समूहमा बाँडिएका थियौँ । विहानको ठीक १०ः१५ बजे प्रमुख अतिथि जिल्ला आयुक्त श्रीराम लामिछाने, देवराज घिमिरे र सगरमाथा आरोही प्रकाश पाण्डे आउनुभयो ।

केहि छिनमा नै हामीलाई कथा सिकाउने बाल साहित्यकार विजयराज आचार्य पनि आउनुभयो । उहाँहरुलाई हाम्रो प्रधानाध्यापक ईश्वर के.सी.र स्काउट गुरु कविराज महर्जनले माला लगाएर स्वागत गर्नुभयो ।

एकछिनपछि स्काउटको झण्डोत्तोलन भयो । राट्रिय गीत र स्काउट गीत बज्यो । त्यसको सम्मानस्वरुप हामी सबै उठ्यौँ । उहाँहरु हाम्रो सबै स्टलहरुमा आउनुभयो र हामीले गरेका कार्यहरु हेर्नुभयो । हामीसँगै हाम्रो कामको पनि प्रशंसा गर्नुभयो । त्यसरी हाम्रो हौसला बढाइदिनुभयो ।

कोही साथीहरुले स्काउटको झण्डाको बारेमा बताए । स्काउट गीत, सीठीे बजाउने तरिका, स्काउटको नियम, स्काउट ग्याजेट, नटिङ्ग, ड्रिल जस्ता कुरा अभिभावकलाई जानकारी गराइयो । सामूहिक खेल, फेस पेन्टीङ जस्ता मनोरञ्जनात्मक क्रियाकलाप पनि रहेको थियो ।

चउरमा विभिन्न रंङका टेन्टहरु हालेर विद्यालय नै रमाइलो भएको थियो । झन् स्काउटको लोगो सहितको रंगोलीले अभिभावकको ध्यान आर्कषण गरेको थियो । जे होस, मेरो विद्यालय एकदम फरक थियो, त्यो दिन। हामी विद्यार्थीहरु रमाइरहेका थियौँ ।

रमाइलो गर्दागर्दै घडीले एक बजाएको पत्तै भएन । निर्धारित समयका अनुसार कार्यक्रम समापनतर्फ हामी लाग्यौँ । कार्यक्रममा उत्कृष्ट गर्ने टोलीलाई पुरस्कार वितरण गरियो । स्काउटको झण्डा झारियो । अन्तमा दूध, केरा र बिस्कुट खाएर हामी आ–आफ्नो अभिभावकसँग घर फर्कियौँ ।

विद्यालयमा हुने यस्ता गतिविधिले हामी विद्यार्थीहरुको आत्मविश्वास बढाउँछ । हामीले आफूलाई सम्मानित हुने मौका पाएको अनुभव गर्यौँ। यस्ता कार्यक्रम समय समयमा भइरहनुपर्दछ । हामी विद्यार्थीहरुले पनि यस्ता कार्यक्रममा सधैँ भाग लिएर विद्यालयलाई सहयोग गर्नुपर्दछ ।

कक्षा–९
जुगल स्कुल (धापाखेल, ललितपुर)