विद्यार्थीले आफ्नै हातमा आगो लगाएपछि. . .

-हरिसुन्दर छुकां/ भक्तपुर । स्कूल ड्रेसमा रहेकी एक छात्राले आफूले लगाइरहेको सर्टको बाहुला माथि सारिन्, टेबलमा साबुनको जस्तो फिँज आइरहेको बाटामा हात धोइन्, तीन पल्ट । त्यसपछि नजिकैको एक साथीले बाटाको पानीमा एउटा बोटल घोप्ट्याइन्, बाटामा साबुनको फिँज र फोकाहरु उनले हत्केलामा उठाइन् ।

अर्को छात्राले बगलीबाट लाइटर झिकिन् र आफ्नै सहपाठीको हत्केलामा आगो लगाइन् ।

लगाएको आगो झिलिक्क बल्यो, क्षणभर । आगो लागेका छात्राले आफ्नो हात छामिन्, केही भएको रहेनछ । उनी दंग परिन् ।

त्यो दृष्य हेरिरहेका अन्यलाई छात्राले अनुरोध गरिन्, ‘तपाइँ मैले जस्तै आफ्नो हातमा आगो बाल्न सक्नुहुन्छ ?’ हेरालु कोहीले पनि आँटेनन् ।
भक्तपुर नगरपालिकाद्धारा सञ्चालित ख्वप कलेज देकोचामा बुधबारदेखि सुरु भएको शैक्षिक प्रदर्शनीका क्रममा स्टल राखेको प्रभात माविका विद्यार्थीले त्यो प्रदर्शनी गर्दा हेर्नेहरुको निक्कै घुइँचो लागेको थियो ।

आफूले पाठ्यपुस्तकमा पढेका विषयलाई विद्यार्थीले प्रयोगात्मक तरिकाले प्रदर्शनी गर्न पाउँदा प्रदर्शनी हेर्ने हेरालु विद्यार्थी, शिक्षक, प्रधानाध्यापकलगायत दंग थिए भने प्रदर्शन कर्ता अझ दंग ।

ख्वप माविको १९ औं, ख्वप कलेजको १७ औं र शारदा क्याम्पसको २८ औं वार्षिक उत्सवको अवसरमा भएको दुईदिने प्रदर्शनीमा आयोजकले अन्य विद्यालयलाई पनि निमन्त्रणा गरेको थियो । त्यही निमन्त्रणाको उपयोग गर्दै प्रभात माविले जस्तै अन्य विद्यालयले पनि शैक्षिक प्रदर्शनी गरेका थिए ।

कलेज प्राङ्गणमा राखिएको प्रदर्शनीमा देकोचाकै जेन्यूइन सेकेण्डरी स्कुलका विद्यार्थीहरुले अटोमेटिक फुड सप्लायर्स भेइकल प्रदर्शनी गरी वारिबाट पारी खाद्यान्न पुर्याएका थिए । उनीहरुले विपद्को समयमा मा राहतका लागि उपयोगी हुने सो भेइकल प्रदर्शनी गरिरहँदा धेरैले २०७२ सालको भूकम्पलाई सम्झे । अवलोकनकर्ताहरुले ‘त्यो बेला यो खालको सवारी भएको भए कति सहज हुने थियो’ भन्ने बताइरहँदा सो सवारी बनाएका विद्यार्थी रोहन सुवालले त्यस्तै परिस्थितिले यो खालको कन्सेप्ट आएको बताए ।

बाहिरको स्टलअन्तर्गत ज्वालामुखी विस्फोट, हिमालयन ग्लोरी स्कुलले आधुनिक थोपा सिञ्चाइ प्रविधि, सिक्का छुट्याउने मेसिन, ख्वप इञ्जिनियरिङ कलेजका विद्यार्थीहरुले हाइड्रोलिक पुल, जेसिस माविले ग्यास उत्पादन र चुम्बकीय शक्ति अनि पारागन एकेडेमीले भने भ्याकुम क्लिनर र रकेटको प्रदर्शनी गरेका थिए ।

त्यो प्रदर्शनी हेरिरहेका भक्तपुरकै राजर्षी गुरुकूलका प्रिन्सिपल लियोन श्रेष्ठले शैक्षिक प्रदर्शनी राम्रो भएको टिप्पणी गर्दै छुटाउन नहुने बताए ।
भक्तपुर नगरपालिका क्षेत्रभित्रका विद्यालयहरुका स्टलका साथै प्रदर्शनीमा ख्वप मावि, ख्वप कलेज र शारदा क्याम्पसमा दश जोड दुईदेखि स्नातकोतर तह अध्ययनरत विद्यार्थीले पनि स्टलहरु राखेका थिए ।

खेर गएका र जाने कागजबाट बनाइएका विभिन्न सामानहरु, मनकामना जाँदा प्रयोग हुने केवलकारको नमूना, बढिरहेको बजारको प्रवृत्ति र प्रकृति झल्किने स्टल, पुराना पैसा र सिक्कालगायतको स्टल राखिएको थियो ।

मानविकी, व्यवस्थापन, विज्ञान र शिक्षा संकायमा पढिरहेका विद्यार्थीहरुले आफूले पढ्दै गर्दाका विषयसँग सम्बन्धित विभिन्न शैक्षिक सामग्रीहरु बनाइ प्रदर्शन गरेका छन् ।

सो प्रदर्शनीको उद्घाटन तथा अवलोकन नेपाल मजदुर किसान पार्टीका अध्यक्ष नारायणमान बिजुक्छें, राष्ट्रिय परीक्षा बोर्डका अध्यक्ष चन्द्रमणि पौडेल लगायतले गरेका थिए ।