प्याब्सनभित्र राजनिती गर्नु हुँदैन—मेयर श्रेष्ठ

मध्यपुर थिमि— मध्यपुर थिमि नगरपालिकाका प्रमुख मदनसुन्दर श्रेष्ठले निजी तथा आवासीय विद्यालय अर्गनाईजेशन नेपाल (प्याब्सन) भित्र राजनिती नगर्न आग्रह गरेका छन् । मध्यपुरथिमि प्याब्सन नगरकार्य समितिका नवनिर्वाचित पदाधिकारीहरुलाई बधाई, शुभकामना दिन आयोजित कार्यक्रममा बोल्दै श्रेष्ठले निजी विद्यालयले दिँदै आएको १० प्रतिशत छात्रवृत्ति मध्ये २०७६ सालदेखि ५ प्रतिशत छात्रवृत्ति मध्यपुरथिमी नगरपालिकाले परीक्षा लिएर मेहनत र जेहेन्दार विद्यार्थीैलाई दिने बताए ।
उनले यो वर्षदेखि कक्षा ८ को परीक्षा नगरपालिकाले नै लिने, नगरका विद्यालय बीच विभिन्न अतिरिक्त क्रियाकलाप गर्ने र स्थानीय पाठ्यक्रम बन्दै गरेको जानकारी दिएका थिए ।
मन्टेश्वरी भनेर खुलेका मन्टेश्वरी स्कुललाई १ कक्षाको स्वीकृति नदिने र विना स्वीकृति चलाए कारवाही हुने उनले बताए ।
कार्यक्रममा भक्तपुर प्याब्सनका वरिष्ठ उपाध्यक्ष चन्द्र अधिकारीले निजी विद्यालयको स्थापनादेखि नै निजी विद्यालयलाई अवरोध बाबजुत पनि यहाँसम्म आएको र निजी विद्यालयलाई सरकारले नबाध्ने हो भने निजी विद्यालयले ठूलो फड्को मार्ने बताए ।
त्यस्तै प्याब्सन केन्द्रीय उपाध्यक्ष दीपिका थापा रिमालले शिक्षाको समस्याबारेमा प्याब्सनले राष्ट्रपतिलाई जानकारी गराएको बताउँदै सरकारले नीजि विद्यालयलाई प्राविधिक शिक्षाको अनुमति नदिएर विभेद गरेकाले यो विभेदको अन्त्य हुनुपर्नेमा जोड दिइन् ।
प्याब्सन भक्तपुरका वरिष्ठ सल्लाहकार भूवनलाल श्रेष्ठले मध्यपुरथिमिलाई देशकै नमूना र उत्कृष्ट शैक्षिक गन्तव्य बनाउन निजी विद्यालय र स्थानीय सरकारले संयुक्त पहल गर्नु पर्नेमा जोड दिए ।
भक्तपुर प्याब्सनका अध्यक्ष श्री कृष्ण केसीले क्लस्टरहरुले र जिल्ला प्याब्सनले गर्न नसकेका क्रियाकलाप मध्यपुर प्याब्सन नगरकार्यसमितिले गर्न आग्रह गरेका थिए ।
मध्यपुरथिमि प्याब्सन नगर कार्यसमितिका अध्यक्ष एवं कार्यक्रमका सभापति निलेश आचार्यले मध्यपुरका शिक्षक तथा विद्यालयलाई उत्कृष्ट बनाएर नगरलाई ब्राण्ड बनाएर लाने बताए । उनले मध्यपुरमा शिक्षाको स्वर्णकाल सुरु भएको र नगरपालिकाको सहयोगमा मध्यपुर नगर भित्रका शिक्षण संस्थालाई चिरपरिचित बनाएर अगाडि जानुपर्नेमा जोड दिएका थिए ।