प्याब्सनको योमरी प्रतियोगितामा माउन्ट भ्याली स्कुल प्रथम

भक्तपुर, प्याब्सन नगर समिति भक्तपुरको आयाजेनामा आयोजित प्याब्सन अन्तरविद्यालय योमरी बनाउने प्रतियोगितामा माउन्ट भ्याली स्कुल प्रथम भएको छ ।
कार्यक्रममा भक्तपुर नगरपालिकाका प्रमुख सुनिल प्रजापतिले कुनै पनि काम सानो नहुने बताउनुहुँदै आफूसँग सीप भए कहिल्यै भोको बस्न नपर्ने बताए । योमरी बनाउने प्रतियोगिताले विद्यार्थीलाई उत्साहित बनाएको बताउँदै नयाँ पुस्तालाई योमरी बनाउन सीप सिकाउने राम्रो प्रयास भएको र व्यवसायिक रुपमा विकास गर्न मद्दत पुग्ने बताए ।
कार्यक्रममा संस्कृतिविद् तेजेश्वरबाबु ग्वंगःले भक्तपुर नगरपालिकाले स्थानीय चाडपर्व, संस्कृति जगेर्नालगायतमा उल्लेखनीय कार्य गरिरहेको र भक्तपुरका प्रत्येक विद्यालयमा संस्कृति कक्षा तथा अभिमुखीकरण कार्यक्रमहरूको आवश्यकता औल्याएका थिए ।
संस्कृतिविद् ओम धौभडेलले नेपाल मण्डलको इतिहास, संस्कृति र स्वास्थ्यसँग जोडिएको सभ्यतालाई निरन्तर जोगाइराख्नुपर्ने र योमरी प्रतियागिताले यहाँका कला–संस्कृति सम्पदा संरक्षण कार्यमा मद्दत पुग्ने बताए ।
कार्यक्रमका सभापति एवं भक्तपुर प्याब्सन नगरकार्यसमितिका अध्यक्ष रमेश चन्द्र श्रेष्ठले विद्यार्थीहरुलाई व्यवहारिक ज्ञान दिन, योमरी बनाउने तरिका र योमरीको बारे विद्यार्थीहरुलाई जानकारी दिन कार्यक्रम गरेको जानकारी दिएका थिए ।
भक्तपुर १३ वटा विद्यालयहरूबीच भएको उक्त प्रतियोगितामा गोल्डेन गेट स्कूल द्वितीय, सुर्योदय स्कूल तृतीय र मनकामना इङ्गलिश स्कुलले सान्त्वना पुरस्कार प्राप्त गरेको थियो । कार्यक्रममा प्रमुख अतिथि प्रजापतिले सहभागी विद्यार्थीहरूलाई प्रमाणपत्र र विजयी प्रतियोगीहरूलाई पुरस्कार वितरण गरेका थिए ।

:305 Views

Leave a Reply