एसईईका विद्यार्थीलाई परामर्श

भक्तपुर । यसवर्ष एसईई दिने तयारीमा रहेका विद्यार्थीलाई मंगलबार भक्तपुरमा परामर्श दिइएको छ । जिल्लाका विभिन्न स्कुलका सयौं विद्यार्थीलाई विभिन्न विषयका विषय विज्ञहरुले परामर्श दिएका हुन् । जिल्लाका विभिन्न १३ वटा स्कुलहरुबाट सहभागी तीन सय ७७ जना विद्यार्थीलाई तीन जना विषय विशेषज्ञले परामर्श गरेका हुन् ।
युवा परिचालन गरी समाजमा व्याप्त रहेका समस्याहरुलाई समाधान गर्न सहयोग पुयाउने उद्देश्यका साथ स्थापित युवा जागृति समाज भक्तपुर २ नेपालको आयोजनामा भएको काउन्सुलिंग एण्ड ओरेन्टेशन फर एसईई एपिरेन्स स्टुडेन्ड्स (एसईईमा सहभागी विद्यार्थीका लागि परामर्श तथा प्रशिक्षण) कार्यक्रममा गणित विषयका विशेषज्ञ एनवी खाताखो, विज्ञान विषयका विशेषज्ञ जयानन्द कपाडी र एजुकेशन रिभ्यु अफिस सानोठिमी भक्तपुरका डाइरेक्टर नारायण झाले परामर्श गरेका थिए ।
एसईई दिने विद्यार्थीलाई केही उपयोगी होस् भनेर प्रत्येक वर्ष जस्तै यो वर्ष पनि कार्यक्रम गरेको आयोजक समाजका कार्यक्रम निर्देशक उमेश दुवालले बताए । कार्यृक्रमका लागि सिवर्ड इन्टरनेशनल कलेज र एसईआई ब्रिज कोर्षले सहयोग गरेको उनले जनाए ।