एसईई दिने विद्यार्थीहरूका लागि परामर्श कार्यक्रम

भक्तपुर, विनायक शिक्षा निकेतन ई.सेकेण्डरी स्कुल, मध्यपुर ठिमीको पहलमा 4S Educational Nepal, SEI, सल्लाघारी र विद्यार्थी पब्लिकेशनको संयुक्त आयोजनामा भक्तपुर जिल्लाका विभिन्न विद्यालयमा अध्ययनरत एसईईमा सहभागी विद्यार्थीलाई परामर्श तथा अभिमुखीकरण कार्यक्रमको आयोजना गरेको छ । कार्यक्रममा विभिन्न विद्यालयका २१७ जना विद्यार्थीहरू सहभागी भएका थिए । 4S Educational Nepal का अध्यक्ष तथा विनायक शिक्षा निकेतनका प्रिन्सिपल सुरेन्द्रविक्रम प्रजापतिको संयोजनमा सञ्चालन भएको उक्त कार्यक्रममा गणित विषयका विषयविज्ञ एन.बि.खाताखो तथा विज्ञान विषयका विशेषज्ञ जे.पि.श्रीवास्तवद्वारा एसईई परीक्षामा गणित र विज्ञान विषयमा कसरी उत्कृष्ट अङ्क ल्याउने, विषयसँग सम्बन्धित समस्याहरू कसरी समाधान गर्ने, अब बाँकी रहेका दिनहरूलाई कसरी उपयोग गरी ग्रेडवृद्धि गर्ने भन्ने विषयमा विद्यार्थीहरूलाई परामर्श दिइएको थियो । कार्यक्रममा विनायक स्कुलका सहायक प्रिन्सिपल प्रेमप्रसाद निरौलाले एसईई फलामको ढोका नभएर उज्जवल भविष्यको द्धार भएकाले सबैलाई उत्कृष्ट ग्रेडका साथ सफलताको शुभकामना दिएका थिए । त्यस्तै SEI का प्रबन्धक अंगद महतोले एसईई पछाडिको समयलाई सदुपयोग गर्नसके भोलिको भविष्य अझ उज्ज्वल हुने कुरामा जोड दिए ।