अब भक्तपुरमै कृषि पढाइ हुने

भक्तपुर, १२ साउन । भक्तपुरको बासु माध्यमिक विद्यालयले विद्यालय तहमै कृषि विषय अध्यापन गराउने भएको छ ।

विद्यालयले यस वर्षदेखि प्राविधिक शिक्षा तथा व्यवसायिक तालिम परिषद्अन्तर्गत रहेर आईएस्सी कृषि विषय अध्यापन गराउने विद्यालयले आयोजना गरेको कार्यक्रमा जानकारी दिइएको हो ।

विद्यालयको शैक्षिक गतिविधि लगायत यसै वर्षदेखि पढाइ हुने सो विषयबारेमा विद्यालयका सरोकारवालालाई जानकारी दिन आयोजित कार्यक्रममा विद्यालयले सम्पूर्ण तयारी सकाएको विद्यालयका प्रधानाध्यापक अम्बिका न्याईच्याईले जानकारी दिइन् ।

विद्यार्थीलाई शैक्षिक प्रमाणपत्र मात्र नभएर सीप पनि दिनका लागि कृषि विषय अध्यापन गराउने बताउँदै प्रअ न्याइच्याईले भक्तपुरको चाँगुनारायण नगरपालिकाको झौखेलमा १३ रोपनी जग्गा भाडामा लिइसकेको पनि जानकारी दिइन् ।

‘हाम्रो मुख्य आधार भनेको कृषि नै हो, मात्र ह्वाइट कलर जब गर्ने प्रवृत्तिले जागिर खाने, स्वावालम्बी बन्ने भावनामा कमी आएको छ, विद्यार्थीलाई पढाइसँगै सीप दिनुपर्छ । सीप भएको खण्डमा रोजगारीको लागि विदेश जाने प्रवृत्तिमा कमी आउँछ ।’ उनले भनिन् ।

सोही कार्यक्रममा प्राविधिक शिक्षा तथा व्यावसायिक तालिम परिषद्का पूर्व परीक्षा नियन्त्रक दोब्बरलाल सिलाकारले कृषिप्रधान देशमा कृषिम्बन्धी पढाइ आवश्यक भएको बताउँदै कृषिमा सुधार नगरी देशको कुनै पनि क्षेत्रमा सुधार नहुने र आत्मनिर्भर नहुने बताए ।

वि.सं. २०१९ सालमा स्थापना भएको बासु माविले गरेको सो कार्यक्रममा कृषि तथा बाली विज्ञान कार्यक्रमका संयोजक सबिन ख्याजू र डिप्लोमा इन कम्प्युटर इञ्जिनिरिङका संयोजक आयुष दुमरुले विषयगत रुपमा प्रस्तुति गरेका थिए ।

कार्यक्रममा विद्यालय व्यवस्थापन समितिका अध्यक्ष सरोजराज गोसाइँले शिक्षालाई व्यावहारिक बनाउनका लागि व्यवहारिक शिक्षा दिने पाठ्यक्रमको आवश्यकतामा जोड दिए । विद्यालयले कृषि पठनपाठन गराउने विषयलाई विद्यालय व्यवस्थापन समितिका पूर्व पदाधिकार, पूर्व प्रअ, पूर्व शिक्षकलगायतले स्वागत गरेका थिए ।

:400 Views

Leave a Reply