नेकमा परामर्श तालिम

भक्तपुर, चैत ३० | नेपाल इन्जिनियरिङ कलेज (नेक) दुवाकोट भक्तपुरले कलेजका शिक्षकशिक्षिकाहरुका लागि परामर्शदात्री तालिम दिएको छ । विद्यार्थीलाई परामर्श दिने शिक्षकशिक्षिकाहरूलाई सही तरिकाले र उचित परामर्श दिन थप सक्षम बनाउन दुईदिने परामर्शदात्री तालिम सम्पन्न गरेको कलेजले जनाएको छ ।

कार्यक्रममा कलेजका ४८ जना शिक्षक शिक्षिकाहरू सहभागी रहेका थिए । उनीहरुलाई परामर्श विशेषज्ञ डा. केदार रायमाझी र मनोविज्ञान विज्ञ एन्टेना रन्जितबाट तालिम दिएका थिए । तालिम समापनपश्चात दिक्षित शिक्षकशिक्षिकाहरूले तालिमबाट आफूहरूलाई परामर्श सम्वन्धी आधारभुत ज्ञान तथा थप शीप प्राप्त भएको बताए । आगामी शैक्षिक सत्रहरूमा अझ वढी प्रभावकारी परामर्श दिन सक्षम बनाएको उनीहरुले बताए । कलेजका प्राज्ञिक संयोजक उपप्राध्यापक मोहनध्वज के.सी.को संयोजनमा भएको तालिमपश्चात दिक्षित शिक्षकशिक्षिकाहरूलाई प्रमाणपत्र वितरण गरिएको थियो । कार्यक्रममा कलेजका प्राचार्य प्रा.डा. हरिकृष्ण श्रेष्ठले सही तरिका र उचित परामर्शले कलेजका लगभग दुई हजार एक सय स्नातक तथा स्नातकोत्तर विद्यार्थीको शैक्षिक उन्नयन तथा व्यक्तित्व विकासमा सघाउने विस्वास व्यक्त गरे । उनंले कार्यक्रमको उपलव्धीलाई विष्लेषण गरी यसप्रकारका कार्यक्रमहरू भविष्यमा पनि आयोजना गर्ने प्रतिवद्धता व्यक्त गरे ।