सिमा मिचिनुमा हाम्रै कमजोरीः सिमाविद् श्रेष्ठ

भक्तपुर । सिमाविद् बुद्धीनारायण श्रेष्ठले देशको सिमा मिचीमिची पनि हामी नेपाली चुपचाप बसिरहनु पर्नु दुःखको कुरा भएको बताएका छन् । आजका विद्यार्थीमा देशभक्ति भाबना जगाई सिमा रक्षाका लागि लाग्नुपर्ने उनले जोड दिए ।

भक्तपुरको मिवाछें व्यासीस्थित एभरेष्ट इंग्लिश स्कुलले २०७६ सालमा स्कुलमा भर्ना भएका विद्यार्थी र तिनका अभिभावकको सम्मानमा शनिबार गरेको फ्रेसर वेलकम (नयाँंलाई स्वागत) कार्यक्रममा सिमाविद् श्रेष्ठले हाम्रा आफनै कमजोरीका कारण सिमा मिचिरहेको बताए । देशको रक्षा गर्नु, सिमानाको रक्षा गर्नु हामी सवैको कर्तव्य हो, उनले भने, देशलाई हामी सवैले प्रेम गर्नुपर्छ ।
कार्यक्रममा प्रमुख अतिथि बुद्धिनारायण श्रेष्ठद्धारा लिखित दुई वटा पुस्तक सिमाना र भूकम्प स्कुललाई हस्तान्तरण गरिएको थियो । कार्यक्रममा किड्स पाराडाइज स्कुलका प्रिन्सिपल अर्चना भण्डरीलाई सम्मान गरिएको थियो ।

कार्यक्रममा विद्यालय व्यवस्थापन समितिका अध्यक्ष रामगोपाल कर्माचार्य, स्कुलका संस्थापक प्रिन्सिपल भक्त राजभण्डारी, सहायक प्रिन्सिपल कमलादेवी राजभण्डारी अमात्यलगायतले स्कुल गतिविधिका विविध विषयमा चर्चा गरेका थिए । कार्यक्रममा विद्यार्थीले साँंस्कृतिक कार्यक्रम पनि देखाएका थिए ।