मध्यपुरथिमिमा स्थानीय पाठ्यक्रम लागु

जेठ २४, भक्तपुर । मध्यपुरथिमि नगरपालिकाले आफ्नो नगरपालिकाभित्रका सामुदायिक एवं संस्थागत विद्यालयमा  जेठ २५ गतेदेखि स्थानीय पाठ्यक्रम लागु गरेको छ ।

नगरपालिकाले नगरक्षेत्रका १८ वटा सामुदायिक र ५२ वटा संस्थागत गरी कूल ७० वटा विद्यालयमा तयार पारेको ‘मध्यपुरथिमि म्हसिका’ अर्थात् मध्यपुरथिमिको ‘परिचय’ नामक स्थानीय पाठ्यक्रम लागु  गरेको नगर प्रमुख मदनसुन्दर श्रेष्ठले जानकारी दिए । श्रेष्ठले मध्यपुर थिमी नगरपालिकाको रहनसहन, रितिरिवाज, कला संस्कृति, इतिहास, पेशा ब्यवसाय, जात्रा पर्व, संस्कार, विवाह, व्रतबन्ध, भौगोलिक बनावट, वातावरण लगायत विविध १० ओटा विषयमा अध्ययनअध्यापन गराउने जानकारी दिए ।

सांस्कृतिक पर्व सिठी नखःको अवसर पारेर नगर क्षेत्रका सबै विद्यालयले आआफ्नो विद्यालय नजिकैका पानीका मुहान, इनार, धाराको सरसफाइ गर्दै व्यावहारिक रुपमै स्थानीय पाठ्यक्रम लागु गरेको उनले बताए ।

शिक्षाविद् एवं सानोठिमी क्याम्पस विज्ञान संकाय प्रमुख रामकृष्ण दुवालको संयोजकत्वमा, बालप्रेमी स्कुलका प्रधानाध्यापक चरणकेशरी श्रेष्ठ र अमिनिटी स्कुलका प्रिन्सिपल सूर्यबहादुर भण्डारी सदस्य रहनेगरी स्थानीय पाठ्यक्रम निर्माण समिति गठन गरेको थियो । उक्त पाठ्यक्रम १०० पूर्णाङ्कको हुने र उक्त पाठ्यक्रम सामुदायिक तथा संस्थागत विद्यालयहरुमा लागु गरेको मध्यपुर थिमी नगरपालिकाका नगर प्रमुख श्रेष्ठले बताए । 

मध्यपुरथिमिका शिक्षा शाखा प्रमुख बालकृष्ण गैरेले यो वर्ष कक्षा ६ मा स्थानीय पाठ्यक्रम लागु गरेको बताए । उनले आगामी वर्ष कक्षा १ र कक्षा ७ मा समेत स्थानीय पाठ्यक्रम लागु गर्ने बताए ।