‘अनि छुट्यो शिक्षामन्त्रीको पसिना’

भक्तपुर, ११ साउन । भक्तपुर नगरपालिकाले आफ्नै पहल र लगानीमा शिक्षामा लगानी गरिरहेको छ । नगरपालिकाको आफ्नै आम्दानीबाट ७ वटा शैक्षिक संस्था र स्वास्थ्य केन्द्र सञ्चालन भइरहेको छ ।

यतिमात्र नभएर भक्तपुर नगरपालिका अहिले ख्वप विश्वविद्यालय सञ्चालन गर्ने योजनामा छ । त्यस निम्ति नगरपालिकाले तदारुकताका साथ योजना बनाउने काममा लागिरहेको छ ।

स्थानीय तहबाट सञ्चालित हुने पहिलो विश्वविद्यालय भनेर संसदमै पनि विधेयक दर्ता भइसकेको छ । विधेयक दर्ता भए पनि अझ पनि संसदमा टेबल हुन नपाउँदा ख्वप विश्वविद्यालय आउन नसकेको बताउँदै नेपाल मजदुर किसान पार्टीका सचिव एवं प्रतिनीधिसभा सदस्य प्रेम सुवालले भक्तपुर नगरपालिकाले शिक्षा र स्वास्थ्य क्षेत्रमा गरेको प्रगतिले सरकारमा गएका दलका नेताहरु र शिक्षामन्त्री समेत तर्सेको बताए ।

भक्तपुर नगरपालिका वडा नं. १ भार्वाचोमा रहेको गणेश माध्यमिक विद्यालयले आयोजना गरेको एसईई उत्तीर्ण विद्यार्थीलाई बधाई तथा मार्गनिर्देशन कार्यक्रममा सांसद सुवालले सरकारको कारण ख्वप विश्वविद्यालयको अनुमति नपाएको बताए ।

‘अहिले भक्तपुर नगरपालिकाले ७ वटा शैक्षिक संस्था सञ्चालन गरिरहेको छ । ती शैक्षिक संस्थाहरुले न्यूनत्तम शुल्कमा शिक्षा प्रदान गरिरहेको छ । त्यो काम नगरपालिकाले गरिरहेको छ । नगरपालिकाले हस्पिटल र शिक्षालय खोल्दा शिक्षामन्त्रीको पसिना छुटेको छ ।’

नले सरकार स्थानीय तहलाई भन्दा व्यक्तिलाई कलेज तथा अस्पताल सञ्चालन गर्न दिनेप्रति उद्यत रहेको र त्यसविपरीत नगरपालिकाले काम गर्दा मन्त्रीहरु तर्सेको उल्लेख गर्दै भने ।

उनले शिक्षण पेशालाई सरकारले नै बद्नाम गरेको र मर्यादित बनाउन नसकेको बताउँदै विद्यार्थीलाई देशको आवश्यकता पूरा हुने विषय रोज्न सुझाव दिए । कार्यक्रममा विद्यार्थीहरुलाई सम्मान गर्दै सांसद सुवालले शिक्षाको माध्यमबाट जनताको सेवा गर्ने काम पार्टीबाट विजयी जनप्रतिनीधिहरुले गरिरहेको बताए ।

कार्यक्रममा शिक्षा विकास तथा समन्वय इकाई भक्तपुरका प्रमुख हरि दाहालले कक्ष १० सम्ममात्र विद्यालय शिक्षा हो भन्ने भ्रमलाई निराकरण गर्नुपर्ने आवश्यकतामा जोड दिए ।

उनले विद्यालयको सफलताले नै शिक्षाको स्तर मापन गर्ने बताउँदै आवश्यक दरबन्दीका लागि स्थानीय तहसँग समन्वयको काम भइरहेको बताए ।

बासु माविकी प्रअ अम्बिका न्याइच्याईले विद्यार्थीलाई असल बनाउने काम शिक्षकको भएको बताइन् ।

सो विद्यालयबाट एसईई २०७४ उत्तीर्ण २२ विद्यार्थीलाई सम्मान गरिएको कार्यक्रममा विद्यालयका प्रअ गंगाप्रसाद याकामी र विद्यालय व्यवस्थापन समितिका अध्यक्ष कृष्णबहादुर दुगुजुले पनि बोलेका थिए ।

:381 Views

Leave a Reply