नेपालमा पहिलो पटक केनदामा प्रतियोगिता भोलि हुँदै

भक्तपुर, ७ असार । नेपालमा पहिलो पटक जापानी खेल केनदामा प्रतियोगिता भोलि हुने भएको छ । शुक्रबार भक्तपुरमा पत्रकार सम्मेलन गर्दै भोलि असार ८ आइतबार स्पर्धा हुने जानकारी दिइएको हो ।

नेपाल केनदामा नेटवर्कका संयोजक पुण्यराम कवां यो खेलले विद्यार्थीको शारिरीक र मानसिक विकास गर्ने बताउँछन् । खेलका विषयमा उनी भन्छन्, ‘केनदामा आँखा र हातबचिको तालमेल मिलाउँदै बल र कपको प्रयोगबाट खेलिन्छ । यो खेलमा प्रयोग हुने बल, धागो, कप र खेल विधिले सन्तुलन मिलाउन र ध्यान केन्द्रित गर्न सहयोग गर्छ ।’ नेपालभरि ५ वर्षभित्र यसलाई प्रोजेक्टको रुपमा विकास गरी अन्तर्राष्ट्रिय रुपमा नेपालका विद्यार्थीलाई सो खेलमा सहभागी गराउने संस्थाको लक्ष्य रहेको उनले जानकारी दिए ।

पत्रकार सम्मेलनमा केदनामा खेलका विश्व विजेता कुबोटाले खेल खेल्न सकिने विभिन्न तरिका प्रस्तृत गरेका थिए । त्यस्तै जापानको कान्सेइ गकुइन युनिभर्सिटिका प्रोफेसर नारु एजाकीले केनदामा खेलबाट विद्यार्थीको सिक्ने क्षमता बढ्छ भन्ने विषयमा अनुसन्धान पनि गर्न लागिएको बताइन् ।

नेपाल केनदामा नेटवर्कको आयोजनामा हुने स्पर्धामा पारागन एकेडेमी, चम्पक विद्यापीठ, हिमालयन ग्लोरी र डेमोस स्कुल गरी जम्मा ८४ जना विद्यार्थीबिच प्रतिस्पर्धा हुने छ । स्पर्धामा प्रथम, द्वितीय र तृतयि हुने विद्यार्थीलाई मेडल र प्रथम हुने विद्यालयलाई रनिङ्ग सिल्ड प्रदान गरिने आयोजकले बताएको छ ।