‘स्थानिय सरकारले शिक्षक सेवा आयोग पास भएकालाई मात्र शिक्षकमा राखौँ’ : शिक्षा मन्त्री

भक्तपुर, ९ असार । शिक्षा, विज्ञान तथा प्रविधिमन्त्री गिरिराजमणि पोखरेलले स्थानिय सरकारलाई विद्यालयमा शिक्षक छनोट गर्दा शिक्षक सेवा आयोग पास भएकालाई मात्र शिक्षक राख्न अनुरोध गरेका छन् । चाँगुनारायण नगरपालिकाले निर्माण गरेको स्थानीय पाठ्यक्रम ‘हाम्रो चाँगुनारायण’ सार्वजनिक कार्यक्रममा मन्त्री पोखरेलले सामुदायिक विद्यालयमा शिक्षक राख्दा नातावाद नहेरि गुणात्मक शिक्षक छनोटमा जानुपर्ने बताएका छन् ।

देशभर अहिले पनि करिब सात लाखले शिक्षण अध्यापन अनुमतिपत्र लिएको भएता पनि धेरै वेरोजगारी रहेको उनले जानकारी दिए ।

मन्त्री पोखरेलले आगामी योजना सुनाउँदै भने, ‘हाम्रो लक्ष्य भनेको शिक्षित नेपाल बनाउने हो । सामुदायिक विद्यालयले वर्गलाई समान गराउने भएकाले यसलाई सवल बनाउने, स्कुलमा बृहत हरियाली बनाउन वृक्षरोपण गर्ने योजना रहेको छ । त्यस्तै विश्व विद्यालय शिक्षामा नयाँ अनुसन्धानलाई जोड दिने छौँ ।’

नेपालको शिक्षामा ३ घण्टाको परिक्षाले विद्यार्थीलाई मुल्याङ्कन गरिने र घोकन्ते शिक्षामा केन्द्रित भएकोमा उनको गुनासो छ । अहिले प्राविधिक शिक्षामा भएका विद्यार्थी बढाएर आगामी दिनमा ८० प्रतिशत विद्यार्थी प्राविधिक, व्यवहारिक र सिपमूलक शिक्षामा लाग्न प्ररित गर्नुपर्नेमा उनले जोड दिए ।

त्यस्तै शिक्षामा क्रान्ति र परिवर्तन गर्ने हो भने सिकाइ केन्द्रित अध्यापन हुनुपर्ने बताउँदै उनी भन्छन्, ‘शिक्षा जागिर खाने ठाउँ होइन । स्कुलको रुपान्तरण र विद्यालयमा शिक्षकले दिइने धयानबाट शिक्षकको मुल्याङ्कन हुन्छ । त्यसैले शिक्षकले नयाँ पुस्तालाइ सहि ढङ्गले सिकाउन सक्नुपर्छ ।’

कार्यक्रममा नगरपालिकाका प्रमुख सोमप्रसाद मिश्रले चाँगुनारायण नगरपालिकाले कक्षा ६, ७ र ८ का लागि ‘हाम्रो चाँगुनारायण’ नामक पाठ्यक्रम निर्माण गरी यस वर्ष कक्षा ८ को मात्र पाठ्यक्रम अनिवार्य रुपमा लागु गर्ने जानकारी दिए । कक्षा ६ र ७ का पाठ्यक्रम अर्को शैक्षिक सत्रबाट लागु गरिने उनले बताए ।

:318 Views

Leave a Reply