भीमेश्वर एकेडेमीमा व्यवस्थापन सङ्कायमा कक्षा ११ संचालन हुने

काठमाडौँ । काठमाडौँ कागेश्वरीस्थित भीमेश्वर एकेडेमीले शैक्षिक शत्र २०७६ बाट व्यवस्थापन सङ्कायमा कक्षा ११ को पठनपाठन शुरु गर्ने भएको छ ।

होटल व्यवस्थापन, अर्थशास्त्र र कम्प्युटर विज्ञान विषय समावेश गरि कक्षा ११ सञ्चालनमा आउने जसले देशकै उत्कृष्ट विद्यालयको रुपमा पठनपाठन गराइ उत्कृष्ट नतिजा दिने विद्यालय प्रशासनले प्रतिवद्धता गरेको छ । भक्तपुरमा एक पत्रकार सम्मेलन गरी सो कुराको जानकारी विद्यालयका प्रिन्सिपल अमृत खड्काले दिएका थिए ।

कम्प्युटर विज्ञान र होटल व्यवस्थापन विषयको प्रयोगशाला पूर्णरुपमा सञ्चालनमा रहेको यस विद्यालय जीवनोपयोगी र सीपयुक्त शिक्षा प्रदान गर्ने विद्यालयको रुपमा परिचित रहेको छ । न्यूनतम शुल्कमा गुणस्तरीय शिक्षा दिँदै राष्ट्रकै उत्कृष्ट शैक्षिक स्थलको रुपमा परिचित गराउन सफल यस विद्यालय लामो समयदेखि शिक्षा क्षेत्रमा समर्पित व्यक्तिहरुबाट सञ्चालित विद्यालय हो ।

व्यवहारीक एवं सँस्कारयुक्त शिक्षामा जोड दिँदै २०६२ साल फाल्गुण २१ गते विधिवत दर्ता भइ सञ्चालन भई रहेको यस विद्यालयले २०६३ सालबाट ९० जना छात्र÷छात्राबाट पठनपाठन शुरु गरिएको थियो ।

अतिरिक्त क्रियाकलापमा छात्र/छात्राको चाहाना अनुसार कक्षा सञ्चालन गराउँदै आएको विद्यालयका प्रिन्सिपल खड्का बताउँछन् । नृत्य, चित्रकला, संगीत, कवड्डी, फुटबल जस्ता खेलमा विशेष दख्खल राखी विभिन्न संघ संस्थाले आयोजना गरेको प्रतियोगिताहरुमा विजयी बन्न सफल यस विद्यालयले कवड्डी र नृत्य विधामा राष्ट्रिय रुपमा खेलाडी उत्पादन गरी अन्तर्राष्ट्रिय प्रतियोगिताहरुमा सामेल हुन सफल भएका छन् ।