उत्कृष्ट विद्यार्थीहरुलाई सामुदायिक बोर्डिङ स्कुलको सम्मान

पनौती । सामूदायिक बोर्डिङ स्कुलले एसइईमा उतीर्ण विद्यार्थीहरुलाई पुरस्कार वितरणसँगै उत्कृष्टलाई सम्मान पुरस्कार वितरण, अभिभावक भेला एवम् एस.ई.ई विदाई तथा सम्मान कार्यक्रम सम्पन्न गरेको छ ।

प्रदेश सभा सदस्य बसुन्धरा हुमागाई प्रमूख अतिथि रहनु भएको उक्त कार्यक्रम विद्यालयको सभाकक्षमा भएको थियो । कार्यक्रममा शै.स २०७५ साल भरि भएका विभिन्न अतिरिक्त क्रियाकलाप तथा परीक्षामा उत्कृष्ट नतिजा ल्याउने विद्यार्थीहरुका लागि पुरस्कार वितरण गरिएको थियो । कार्यक्रमका प्रमुख अतिथि हुमागाईले शैक्षिक क्षेत्रमा संस्थागत विद्यालयहरुको भूमिकाको चर्चा गर्दै संस्थागत विद्यालयले आफ्ना विद्यार्थीहरुलाई सामुदायिक विषयमा पनि सक्रिय गराउनु पर्ने बताए । त्यस्तै विशिष्ट अतिथिहरु पनौती नगरपालिककी कार्यवाहक नगर प्रमुख गीता बञ्जाराले संस्थागत तथा सामुदायिक विद्यालय प्रति नगरपालिकाको दृष्टिकोण समान रहने बताइन् ।

प्याब्सन केन्द्रिय सचिव भिमसेन के.सीले पनौतीका संस्थागत विद्यालयहरु एक भई पनौतीलाई शैक्षिक हवका रुपमा विकास गर्ने कार्यमा लग्नु पर्ने बताए । पनौती नगरपालिका शिक्षा शाखाका उप सचिव मधुसुधन अधिकारीले समूदायिक बोर्डिङ स्कुलका कृयाकलापको प्रशंसा गर्दै यसलाई निर्देशन दिए । विष्णू दल गण धुलिखेलका गणपति सुवास खड्काले विद्यालयले नियमित शिक्षणकार्यका अलावा राष्ट्रिय सेवादल मार्फत संचालित तालिम मार्फत पुर्याएको योगदानको चर्चा गर्दै यसले विद्यार्थीहरुको क्षमतामा निखार ल्याउन सहयोग पुग्ने बताए ।

कार्यक्रममा २०७५ सालको एस.ई ई परीक्षामा उर्तिण हुन सफल २४ जना विद्यार्थीलाई सम्मान तथा विदाई गरिएको थियो । उक्त परीक्षामा २४ जना सहभागी भएकामा उत्कृष्ट परिणाम सहित सबै उर्तीण भएका थिए । जस मध्ये उत्कृष्ट जिपिए ३.९५ल्याउन सफल ५ जना विद्यार्थीलाई विभूश्रीकृष्ण, जगत कुमारी अक्षय कोषबाट नगद सहित सम्मान गरिएको थियो । उक्त परीक्षामा सर्वोकृष्ट नतिजा दिलाउन सफल अनिवार्य स्वास्थ्य जनसंख्या तथा वातावरणका शिक्षक ज्ञानदास श्रेष्ठलाई समेत सम्मान गरिएको थियो ।

तीन चरणमा आयोजना गरिएको सो कार्यक्रम विहान १० बजे देखि साँझ सम्म संचालन भएको थियो । जसमा पहिलो चरणमा विद्यार्थीहरुले सांस्कृतिक कार्यक्रम प्रस्तुत गरेका थिए भने दोस्रो चरणमा औपाचारिक कार्यक्रमको आयोजना गरिएको थियो । हरेक वर्ष विद्यालयले यस प्रकारको कार्यक्रम संचालन गर्दै आएको विद्यालयका प्रिन्सिपल पूर्ण कुमार श्रेष्ठले जानकारी गराएका थिए । स्वागत मन्तव्य व्यक्त गर्दै उनले पनौती क्षेत्रको शैक्षिक विकासका लागि सामुदायिक बोर्डिङ स्कूलको महत्वपुर्ण भूमिका रहेको बताए ।
कार्यक्रममा विद्यालय गत शै.सका उत्कृष्ट शिक्षक, उत्कृष्ट सदन तथा विभिन्न विधामा उत्कृष्ट विद्यार्थीहरुलाई सम्मान गरिएको थियो । त्यसै गरि विद्यालयमा १५ वर्ष सम्म अनवरत सेवा गर्ने २ जना शिक्षकहरुलाई सम्मान गरिएको थियो । उत्कृष्ट शिक्षकमा सजना बोलखे तथा १५ वर्ष अनवरत सेवा गर्ने शिक्षकहरुमा बालकृष्ण प्रजापति तथा भगवती सपाकोटा रहेका छन । त्यसैगरी उत्कृष्ट सदन पहेँलो सदनलाई नगद रु १० हजार सहित सम्मान गरिएको थियो ।

सयौं अभिभावकको उपस्थिति रहेको कार्यक्रममा प्यावसन,विभिन्न विद्यालयका प्रतिनिधि,सुरक्षा निकायका प्रनिनिधि,विभिन्न सहकारी संघ संस्थाहरुका प्रनिनिधिहरुको उपस्थिति रहेको थियो । कार्यक्रम विद्यालयका निर्देशक समितिका अध्यक्ष ओमकृष्ण श्रेष्ठको सभापतित्वमा सम्पन्न भएको थियो भने कार्यक्रमको संचालन विद्यालयका शिक्षक प्रविण दाहाल, हिरादेवी श्रेष्ठ र शिवशरण आलेमगर लगायतले गरेका थिए ।