नगरव्यापी लोकनृत्य प्रतियोगितामा क्वालिटी स्कुलको संगीनी नृत्य भयो उत्कृष्ट नृत्य

भक्तपुर, २९ मंसिर । उत्कृष्ट विद्यालयबीचको लोकनृत्य स्पर्धामा क्वालिटी इंग्लिस सेकेण्डरी स्कुल सर्वोत्कृष्ट भएको छ ।

चाँगुनारायण नगरपालिकाले आयोजना गरेको नगरव्यापी लोकनृत्य प्रतियोगितामा नगरकोटको सो विद्यालय प्रथम हुँदै सर्वोत्कृष्ट भएको हो । कोशी अञ्चलका विभिन्न क्षेत्रमा तीजका अवसरमा नाचिँदै आएको संगीनी नृत्यलाई सो विद्यालयका विद्यार्थीहरुले प्रस्तुत गरेका थिए ।

नगरपालिकाको शैक्षिक क्यालेण्डर अनुसार अतिरिक्त क्रियाकलापलाई बढावा दिन तथा लोकनृत्यबारे विद्यार्थीलाई जानकारी दिन आयोजित प्रतियोगितामा क्वालिटीका विद्यार्थीले ‘बाबा र ज्यूको धुरीमा परेवा धुरुरु‘!’ बोलको गीतमा प्रस्तुत गरेको नृत्यलाई नृत्य निर्देशकद्वय एवं कार्यक्रमका निर्णायक मण्डल मनराज केसी र दर्शना लामाले उत्कृष्ट भएको घोषणा गरेका थिए ।

यसअघि नगरपालिकाले वडा नं. १, २ र ३ मा रहेका विद्यालयहरुबीच, वडा नं. ४, ५ र ६ मा रहेका विद्यालयहरुबीच र वडा नं. ७, ८ र ९ मा रहेका विद्यालयहरुबीच स्पर्धा गराएको थियो । स्पर्धाबाट प्रथम, द्धितीय र तृतीयमा छानिएका विद्यालयबीच आइतबार ताथलीको एसएस सदन सेकेण्डरी स्कुलमा स्पर्धा गराएको थियो । स्पर्धामा दुवाकोटको गोल्डेन सुनगाभा सेकेण्डरी स्कूल द्धितीय, दुवाकोटकै प्रज्ञा सेकेण्डरी स्कुल तृतीय र सुडालको वाल्मिकेश्वर मावि सान्त्वना भएको थियो ।

स्पर्धामा द्धितीय हुन सफल गोल्डेन सुनगाभाका विद्यार्थीहरुले थारु समुदायमा नाचिने मगौडा नृत्य, तृतीय भएको प्रज्ञाका विद्यार्थीहरुले थारु समुदायमै नाचिने झाँगड नृत्य र सान्त्वना भएको बाल्मिकेश्वरका विद्यार्थीले गुरुङ समुदायमा नाचिने कौडा नृत्य प्रस्तुत गरेका थिए ।
प्रतियोगितामा उत्कृष्ट विद्यार्थी तथा विद्यालयलाई चाँगुनारायण नगरपालिकाका नगर प्रमुख सोमप्रसाद मिश्रले पुरस्कार दिएका थिए । सो क्रममा उनले विद्यार्थीलाई पठनपाठनका अलावा अतिरिक्त क्रियाकलापमा पनि सहभागी गराएर विद्यार्थीको सर्वाङ्गीण विकास गराउनुपर्नेमा जोड दिए ।

कार्यक्रममा उपप्रमुख वीणा बास्तोला, नगर शिक्षा शाखा प्रमुख वीरबहादुर खड्का, नगर शिक्षा समितिका सदस्य श्रीकृष्ण केसी, नेशनल प्याब्सन भक्तपुरका अध्यक्ष जीबी खड्का, एसएस सदन स्कुलका प्रिन्सिपल मुकेश योञ्जनलगायतले अतिरिक्त क्रियाकलाप र पढाइलाई सँगै लगेरमात्र गुणस्तरीय शिक्षा दिन सकिने बताए ।

:299 Views

Leave a Reply