ब्रिजवाटर कप फुटबलमा डीएभी, माइलस्टोन र ब्राइट फ्युचरको जीत

भक्तपुर । भक्तपुरको मध्यपुर थिमिमा जारी ब्रिजवाटर कप पुरुष फुटबल प्रतियोगितामा सोमबार डीएभी, माइलस्टोन र ब्राइट फ्युचर कलेजले जीत हात पारेका छन् ।

ब्रिजवाटर इन्टरनेसनल कलेजद्वारा आयोजित प्रतियोगिताअन्तर्गत सोमबार भएको पहिलो खेलमा डीएभीले नोबल कलेजलाई ट्राईब्रेकरमा पन्छाएको हो । निर्धा्रित असी मिनेटको खेलमा एकएक गोलको बराबरी भएपछि सीधै पेनाल्टी सुटआउटबाट नतिजा निकालिएको हो । जसमा डीएभीका पाँचै खेलाडीको प्रहार सफल हुँदा नोबलको एउटा प्रहार असफल भयो । डीएभीका गोल रक्षक अमन चौधरीले नोबलका एक खेलाडीको पेनाल्टी प्रहारको बचाउ गर्दै आफ्नो टीमको जीत सुनिश्चित गरे । जसअनुसार गोलरक्षक चौधरी उक्त स्पर्धाको म्यान अफ दी म्याच बन्न सफल भए ।

मध्यपुर थिमि नपा २ सानोठिमीस्थित मध्यपुर युथ एसोसियसनको फुटबल मैदानमा भएको अर्को खेलमा माइल स्टोनले गान्धी इन्टरनेसनल स्कुललाई ३–० गोलले हरायो । विजेता माइल स्टोनको लागि योमन राईले दुई गोल गर्दा अमृत रोकायाले अर्को गोल थपे । दुई गोल गर्ने माइल स्टोनका राई यस खेलका उत्कृष्ट खेलाडी बने । नकआउटको आधारमा भइरहेको प्रतियोगिताको सोमबार भएको अन्तिम खेलमा ब्राइट फ्युचरले युनाइटेड एकेडेमीलाई ४–१ गोलले पराजित गरेको छ । पुकार खड्काको गोलबाट अग्रता लिएको युनाइटेडका खेलाडीहरुको तालमेल नमिल्दा ब्राइट फ्युचरले जीत आफ्नो पोल्टामा पारेको थियो ।

पहिलो हाफमै पाएको पेनाल्टीलाई ब्राइट फ्युचरका माल्दिना याङथोपोले खेर जान नदिएर खेल बराबरीमा ल्याएका थिए । युनाइटेडलाई निरन्तर दबाबमा राखेको ब्राइट फ्युचरका लागि निराजन मल्ल, आशीष खड्का र प्रमिश गुरुङले एकएक गोल थपे । उक्त स्पर्धामा ब्राइट फ्युचरका याङथोपो म्यान अफ दी म्याच घोषित भए । काठमाडौं उपत्यकाका ३२ वटा माध्यमिक विद्यालय तथा कलेजहरुको सहभागिता रहेको प्रतियोगितामा मंगलबार पनि तीनवटा खेल हुने सञ्चार संयोजक ज्ञानु श्रेष्ठले जानकारी दिइन् । प्रतियोगिताको विजेता कलेजले एक लाख र उपविजेताले ५० हजार रुपैयाँ नगद पुरस्कार हात पार्ने छन् ।

:511 Views

Leave a Reply