कोविदा किड्समा अभिभावकले लिए आफ्ना बच्चाको परीक्षा

भक्तपुर । भक्तपुरको लोकन्थलीस्थित कोविदा किड्स प्रि–स्कुलको ‘कोविदा दोस्रो एक्स्प्लोरेसन डे’ सम्पन्न भएको छ । विद्यालयले दिएको प्रश्नावली तथा परीक्षणका तरिकाबाट अभिभावकले आफ्ना बाबुनानीहरुको प्राज्ञिक तथा व्यवहारिक विकासबारे परीक्षण गरेका थिए ।

कार्यक्रममा बालबालिकाको शैक्षिक, मनोवैज्ञानिक तथा व्यवहारिक विकासको अनुशीलन गरिएको थियो । विद्यालयका संस्थापक प्रिन्सिपल सम्जना बस्नेतले बालबालिकाको बहुआयामिक विकासको चरणमा देखा पर्ने विभिन्न समस्या र तिनको वैज्ञानिक समाधान पहिल्याउन उक्त कार्यक्रम गरिएका बताइन् ।

‘अब परम्परागत शिक्षण विधि तथा परीक्षा लिने तरिकामा परिवर्तन ल्याउनुपर्छ । अबको शिक्षण प्रणाली तथा पाठ्यक्रममा पास फेल वा ग्रेडिङभन्दा पनि बालबालिकाको सिर्जनात्मक, वैज्ञानिक र व्यवहारिक प्रगतिमा केन्द्रित हुनुपर्छ ।’ उनले थपिन्, ‘प्रत्येक बालबालिका अभिभावकका प्रतिबिम्ब हुन्छन् । अभिभावकले आफ्नो सन्तान जस्तो भएको देख्न चाहनुहुन्छ, आफू पनि त्यस्तै हुनुपर्छ ।’

विद्यार्थीले आफूभित्र अन्तरनिहित प्रतिभा प्रस्फुटन गर्न अपनाइएको विधि, त्यसको प्रभावकारीताबारे मूल्यांकन तथा दोस्रो त्रैमासिकसम्ममा विद्यार्थीहरुको लेखाइ, बोलाइ र सिकाइ बारे कार्यक्रममा छलफल गरिएको थियो ।