‘निजी विद्यालयमा शिक्षक टिक्दैनन् भन्नु गलत हो’

भक्तपुर, १६ माघ । भक्तपुरको पारागन एकेडेमीका प्रिन्सिपल पुण्यराम कवांले शिक्षकले एउटै निजी विद्यालयमा लामो समयसम्म काम गर्दैनन् भन्नु गलत रहेको बताएका छन् ।

पारागन एकेडेमीको १७ औँ वार्षिकोत्सवमा उनले निजी विद्यालयप्रतिको संकुचित विचारलाई हटाउनुपर्ने भन्दै निजी विद्यालयमा लामो समयसम्म एकै शिक्षकले काम गरिरहन सक्ने प्रष्टाएका थिए । ‘हाम्रै विद्यालयले प्रत्यक वर्ष दिने निरन्तर सेवा पदक सम्मानले यो कुरालाई पुष्टि गर्छ । यसबाट निजी विद्यालयमा शिक्षकहरु दिगो रुपमा बौद्धिक श्रम गर्न तयार हेरेको देखिन्छ ।’ उनले भने ।

विद्यालयले हरेक वर्ष ५ वर्षे र १० वर्षे निरन्तर सेवा गर्ने शिक्षकलाई सम्मान गर्दै आइरहेको छ । यस वर्ष भने १० वर्ष सेवाअन्तर्गत रश्मिला श्रेष्ठ, सुजाता कोजू र रामदेवी मानन्धरले सम्मान पाए भने रचना अधिकारी, श्यामकुमार वैद्य र रश्मिला मानन्धरले ५ वर्षको निरन्तर सेवा पदक पाउन सफल भएका थिए ।

कार्यक्रममा भक्तपुर नगरपालिका प्रमुख सुनिल प्रजापतिले भूगोल, इतिहास र संस्कृति जस्ता विषयमा विद्यार्थी सङ्ख्या कम भएको गुनासो पोख्दै अब विद्यार्थीले देशलाई आवश्यक पर्ने विषय रोज्नु पर्ने सुझाव दिए ।

कार्यक्रममा वर्ष शिक्षक, वर्ष विद्यार्थी र सक्रिय अभिभावकलाई सम्मान गरिएको थियो । शिक्षकतर्फबाट पूर्व प्राविमा सृजना सुवाल, प्राविबाट शर्मिला छुस्याबाग र माविबाट राजेन्द्र फोजू पुुरस्कृत भएका थिए भने विद्यार्थीमा पूर्व प्रावि, प्रावि र माविमा क्रमश: रिसब खत्री, निशान्त कर्माचार्य र भूमिका गुरुङ्ग पुरस्कृत भए ।

वार्षिकोत्सवको अवसरमा ३५० भन्दाबढि विद्यार्थीलाई पुरस्कृत गरिएको थियो । साँस्कृतिक कार्यक्रममा थप रोनक बनाएका थिए भारतीय च्यानलबाट प्रसारित भएको ‘सारेगमप लिटिल च्याम्प २०१९’ मा चौथोस्थान हासिल गरेका आयुष केशीले ।

कार्यक्रममा एसईई दिएका पूर्व विद्यार्थीलाई मायाको चिनो प्रदान गरिएको थियो । वार्षिकोत्सवमा विद्यालय सञ्चालक समितिका अध्यक्ष लक्ष्मीप्रसाद कुसी, मोटिभेटर रमण नेपाली, इसिडिको विज्ञ सानु अमात्य, भक्तपुर नगर शिक्षा प्रमुख हरि निरौला, नेशनल प्याब्सन भक्तपुरका अध्यक्ष जिबी खड्का र मोडन बोर्डिङ स्कुलका बाबुकाजी कस्पाललगायतको सहभागिता रहेको थियो ।

:299 Views

Leave a Reply