देवयज्ञ गर्दै ट्रिटन स्कुलमा सरस्वतीपुजा

काठमाडौँ १७ माघ । श्रीपञ्चमी तथा सरस्वतीपुजाको अवसरमा काठमाडौँको तीनकुनेस्थित ट्रिटन सेकेण्डरी स्कुलमा देवयज्ञ अर्थात अग्नीहोत्रीहोम लगाइएको छ ।

विद्यालयका निर्देशक राजन सुवेदीले विद्यार्थीलाई सनातन हिन्दू धर्मसँस्कृति र सरस्वतीमाताको पुजामा देवयज्ञको महत्वबारे जानकारी दिन, वरिपरीको वातावरण स्वच्छ बनाउन, विद्यालय वरिपरीको राक्षसीप्रवृत्तिको नाश गर्न र अक्सिजनको मात्रा बढाउन यज्ञ गरिएकोे जानकारी दिए ।

पतञ्जली योग समितिका केन्द्रीय सदस्य एवम् नेपाल सरकारका पूर्व सहसचिव राजन खड्काले यज्ञ गर्दै भने, ‘शुद्ध घिउ र जौ तिलको मात्रा मिलाएर यज्ञ गरेमा यज्ञ गरेको स्थानको करीव एक किलोमिटर वरिपरी अक्सिजनको मात्रा वृद्धि हुने धार्मिक आस्था छ ।’

सरस्वती पुजामा सहभागी भएका साना केटाकेटी, विद्यार्थी र अभिभावकहरु सबैलाई सरस्वती माता तथा देवयज्ञको टिका र प्रसाद वितरण गरिएको थियो ।