एभरेस्टको ३७ औँ वार्षिकोत्सवमा पुस्तक वितरण

सबिता नयाँजू

भक्तपुर, १ फागुन । भक्तपुरको मिबाछेँस्थित एभरेस्ट इङ्लिश स्कुलको ३७ औँ वार्षिकोत्सव समारोह तथा पुरस्कार वितरण एवम् पुस्तक हस्तान्तरण कार्यक्रम सम्पन्न भएको छ ।

कार्यक्रमको उद्घाटन भक्तपुर नगर प्रमुख सुनिल प्रजापतिले गरेका थिए । विद्यालयका प्रिन्सिपल भक्त राजभण्डारीले हरेक वर्ष झै यस वर्ष पनि जन्मदिन कोषबाट पुस्तक हस्तान्तरण गरेको बताउँदै उनले भने, ‘विद्यार्थी र शिक्षकको जन्मदिनमा उठाइएको रकमले दुर्गम जिल्लाका सामुदायिक विद्यालयलाई पुस्तक हस्तान्तर गर्दै आइरहेका छौँ । यसले विद्यार्थीलाई सहयोगको भावना सृजना गर्छ ।’

१० वर्षदेखि विद्यालयले गर्दै आइरहेको यो कार्यक्रमअन्तर्गत हालसम्म २१ जिल्लाका २२ विद्यालयका पुस्तकालयमा सहयोग गरेको छ ।

यस वर्ष विद्यालयले ४ जिल्लाका ५ विद्यालयलाई सहयोग गरेको विद्यालय प्रिन्सिपल राजभण्डारीले जानकारी दिए । कार्यक्रममा दार्चुलाको मालिकार्जुन माध्यमिक विद्यालय, मकवानपुरको सिद्धार्थ माध्यमिक विद्यालय, धनकुटाको पुण्य माध्यामिक विद्यालय, काभ्रेपलाञ्चोकको कालिका माध्यमिक विद्यालय र नैमिषारण्य संस्कृत गुरुकुलम्लाई पुस्तक वितरण गरिएको हो ।

कार्यक्रममा भक्तपुर नगरपालिका वडा २ का अध्यक्ष हरिप्रसाद बासुकलाले भक्तपुर नगरपालिकाले आर्थिक रुपमा कमजोर विद्यार्थीलाई शैक्षिक ऋण प्रदान गर्दै आएको जानकारी दिदै भक्तपुर एउटा नमूना नगरपालिका बन्न सफल दाबी गरे ।

वार्षिकोत्सवको अवसरमा विद्यार्थीहरुले नृत्य र गीत प्रस्तुत गरेका थिए ।

प्रशिक्षार्थी