‘बालबालिकाको सबैभन्दा ठूलो कक्षाकोठा नै उसको घर हो’ : प्रिन्सिपल गौतम

भक्तपुर, ११ फागुन । भक्तपुरको दुवाकोटस्थित गोल्डन सुनगाभा इंग्लिश सेकेण्डरी स्कुलका प्रिन्सिपल महेशचन्द्र गौतमले बालिबालिकाको सबैभन्दा ठूलो कक्षाकोठा उसको घर हुने भएकाले अभिभावकले त्यस कक्षाकोठा राम्रो बनाउनुपर्ने बताएका छन् ।

विद्यालयको २४ औं वार्षिकोत्सव र अभिभावक दिवसका अवसरमा उनले विद्यालय र बालक अघि बढाउन अभिभावककै हात हुने उल्लेख गर्दै भने, ‘अभिभावकले आफ्ना बालबालिकालाई ४ स अर्थात् समय, शिक्षा, सिप र संस्कार दिनुपर्छ । बालबालिकासँग साथीको भावनाले अगाडि बढेमा उसको विकासमा मद्दत पुग्छ । आफ्ना बालकलाई माछा मारेर दिने होइन, उसलाई त माछा मार्ने जाली दिनुपर्छ ।’

चाँगुनारायण नगरपालिका प्रमुख सोमप्रसाद मिश्रले उद्घाटन गरेको सो कार्यक्रममा विद्यालयका विभिन्न विधामा उत्कृष्ट भएका विद्यार्थीलाई पुरस्कार वितरण गरिएको थियो । शैक्षिक सत्र २०७५ मा कक्षागत रुपमा प्रथम, द्धितीय र तृतीय हुन सफल विद्यार्थीहरुलाई पुरस्कृत गरिएको थियो । साथै कक्षा ७ का कृतन न्यौपानेले उत्कृष्ट वर्ष गायक तथा सुनगाभा आइडलको उपाधि हासिल गरेका थिए । कक्षा ९ का पियुष श्रेष्ठले उत्कृृष्ट वर्ष कलाकारको उपाधि हासिल गरे । कार्यक्रममा उत्कृष्ट वर्ष नाटक कलाकारमा सञ्जिता दुलाल (कक्षा ९), स्काउटतर्फ उत्कृष्ट विद्यार्थी सयुज्या बास्तोला (कक्षा ७) र उसुतर्फ उत्कृष्ट विद्यार्थी रोहल रसाइली (कक्षा ८) घोषित भएका थिए ।

त्यस्तै वर्षको उत्कृष्ट फुटबल खेलाडीमा कक्षा ४ का आरुष तामाङ र वाद्यतर्फ उत्कृष्ट वर्ष खेलाडीमा कक्षा ९ का रितेश खत्री चयन भएका थिए । कार्यक्रममा शैक्षिक सत्र २०७४ र २०७५ मा एसईई दिएका ५२ जना विद्यार्थीलाई सम्मान गरिएको थियो । पूर्व प्राविबाट सर्जन खड्का, प्राविमा हेमन्त पौडेल र माविमा वेविशा पराजुली विद्यालयका उत्कृष्ट विद्यार्थी चयन भएका थिए । त्यस्तै हाउस रनिङ शिल्ड रेड हाउसले पाएको थियो ।

शनिबार सम्पन्न सो कार्यक्रममा आफ्नो बालबालिकाले गरेका नृत्य, नाटकले अभिभावक खुसी देखिएका थिए ।