चारुमति स्काउटद्वारा पुर्व प्रमुख आयुक्त लामिछानेको सम्मान

काठमाडौं । चारुमति ओपन स्काउट ट्रुप÷क्र्यु मित्रपार्क चावहिलको २३ औं वार्षिकोत्सवको अवसरमा नेपाल स्काउटका पुर्व प्रमुख आयुक्त श्रीराम लामिछानेलाई भव्य सम्मान गरिएको छ ।

पुर्वप्रमुख आयुक्त लामछिानेलाई राष्ट्रगानका रचनाकार प्रदीप कुमार राई ‘व्याकुल माइला’ ले सम्मानपत्र, चारुमति ओपन स्काउट ट्रुप÷क्र्युका सल्लाहकार एवम् वरिष्ठ स्काउटर खड्गबहादुर नेपालीले माला लगाइदिएर र ट्रुप÷क्र्युका अध्यक्ष दिपेश केसीले दोसल्ला ओढाएर सम्मान गरेका थिए ।

प्रमुख आयुक्त रहँदा स्काउटिङ्गको विकास र विस्तार, नेपाल स्काउटलाई आत्मनिर्भर बनाउन विशेष योगदान गर्नुको साथै अन्तराष्ट्रिय क्षेत्रमा नेपाल स्काउटलाई चिनाउन विशेष योगदान गरेवापत पुर्व प्रमुख आयुक्त लामिछानेलाई चारुमति ओपन स्काउट ट्रुप÷क्र्युले भव्य कार्यक्रमका साथ सम्मान गरेको हो ।

नेपाल स्काउटको साधारण सदस्य हुँदै नेपाल स्काउटको सर्वाेच्च पद प्रमुख आयुक्त भएर दुई कार्यकाल अर्थात ८ वर्षसम्म उहाँले नेपाल स्काउटको विकास, विस्तार र नेपाल स्काउटलाई अन्तर्राष्ट्रिय जगतमा चिनाउन विशेष योगदान गर्नुभएको थियो ।  चारुमतिले यसअघि नेपाल स्काउटमा ५० वर्षभन्दा बढी योगदान गर्नुभएका वरिष्ठ स्काउट गुरुहरु प्रा.गोविन्द नारायण ज्यापू, रामवदन जोशी र हरिमोहन ज्योति लगायतलाई सम्मान गरिसकेको छ ।

सो अवसरमा राष्ट्रगानका रचनाकार व्याकुल माइलाले स्काउटिङ्ग शिक्षाले हरेक नागरिकलाई अनुशासित, आत्मनिर्भर र देशप्रेमी बनाउने कुरा उल्लेख गर्दै चारुमति स्काउटले गर्दै आएका राम्रा कार्यको प्रशंसा गरे । त्यस अवसरमा सम्मानित व्यक्तित्व पुर्वप्रमुख आयुक्त लामिछानेले सम्मानको लागि धन्यवाद दिँदै चारुमति स्काउटले स्काउटको विकासमा गरेको योगदानको प्रशंसा गरे । उनले चारुमति अक्षयकोष स्थापनाको लागि आफु र श्रीमती अञ्जु लामिछानेको तर्फबाट १० हजार रुपैयाँ प्रदान गरे । सोही कोषमा इलाइट को—एड स्वयम्भुका प्रिन्सिपल विनय वैद्यले १० हजार, वरिष्ठ स्काउट गुरु उमेशलाल नेपालीले १ हजार १११, अर्का स्काउट गुरु विश्व श्रेष्ठले १ हजार १०० तथा रोभर स्काउट स्काई राईले ५ सय ५ रुपैयाँ प्रदान गरे ।

कार्यक्रममा २००९ सालदेखि नेपाल स्काउटमा आवद्ध जेष्ठ स्काउट गुरु प्रा.गोविन्दनारायण ज्यापू, राष्ट्रिय प्रशिक्षक हरिबहादुर श्रेष्ठ, चारुमति ओपन स्काउट ट्रुप÷क्र्युका अध्यक्ष दिपेश केसी, रेन्जर लिडर सविना श्रेष्ठ, तदर्थ समितिका पुर्व संयोजक चन्दन कौशिक, काठमाडौं महानगरको वडा नं ७ का सदस्य कृष्णमणि भट्टराई र कार्यक्रम संयोजक विनोद पराजुलीले बोलेका थिए । कार्यक्रममा प्रमुख अतिथि व्याकूल माइलालाई अध्यक्ष दिपेश केसीले मायाको चिनो प्रदान गरेका थिए भने चारुमतिको २३ औं वार्षिकोत्सवको अवसरमा आयोजित विविध स्काउट प्रतियोगिताका विजयीलाई पदक तथा प्रमाणपत्र वितरण गरिएको थियो । त्यस अवसरमा स्काउटहरुले विविध गायन र नृत्य प्रस्तुत गरेका थिए ।