२०७६ चैत्र ५ गतेभित्र वार्षिक परीक्षा सम्पन्न गर्न प्याब्सनको निर्देशन

काठमाडौं, २० फागुन । निजी तथा आवासिय विद्यालय अर्गनाइजेशन नेपाल (प्याब्सन) ले कोरोना भाइरसको संक्रमण फैलन सक्ने सम्भावनालाई मध्यनजरमा राख्दै सबै विद्यालयहरुले शैक्षिक सत्र २०७६ को (कक्षा १ देखि ९ सम्मका) वार्षिक परीक्षा २०७६ चैत्र ५ गतेभित्र सम्पन्न गरिसक्न सदस्य विद्यालयहरुलाई अनुरोध गरेको छ ।

मंगलबार प्रेस विज्ञप्ति जारी गर्दै प्याब्सनले विद्यालयहरुले आयोजना गर्ने वार्षिक कार्यक्रम अभिभावक दिवस, सामूहिक छलफल, अन्तरक्रिया जस्ता जनभेला हुने कार्यक्रमहरु स्थगन समेत गर्न प्याब्सनले अनुरोध गरेको छ । साथै कोरोना भाइरसका सम्बन्धमा जनचेतानामूलक कार्यक्रमहरु सञ्चालन गर्न गराउन आग्रह गरिएको छ ।

शैक्षिक सत्रको अन्त्यसँगै अहिले विद्यालयहरु वार्षिकोत्सव र अभिभावक दिवस मनाउने तयारीमा रहेका छन् । कति विद्यालयले मनाई सकेका छन् भने कति विद्यालय मनाउने तर्खरमा छन् । तर, कोरोना भाइरसको त्रासका कारण यस्तो निर्णय लिएको प्याब्सनले जनाएको छ ।

विश्वभर फैलिरहेको कोरोना भाइरसलाई मध्यनजर गर्दै वार्षिकोत्सव तथा अन्य कार्यक्रम स्थागित गर्न प्याब्सनले विद्यालयलाई सूचित गरेको छ । विद्यालय क्षेत्र बढी मात्रामा सर्वसाधारण आवतजावत हुने क्षेत्र भएकाले विद्यालयहरु संवेदनशील र सचेत हुनुपर्ने प्याब्सनको भनाई छ ।